الخميس، 6 ديسمبر 2012

زمن الحداد

أميرة
شوفتي الناس بتموت بعضها ازاي؟
شوفتي رئيس بلدنا بيموت ولادنا ازاي؟
العالم مش بس مكان سيء للحياة يا أميرة
العالم مكان سيءللموت
 اصل انا لما بتخيل المكان اللي هموت فيه والموتة اللي هموتها
مبفكرش اموت بايد واحد عايش في نفس  البلد بيتنفس نفس الهوا وببيدوس على نفس التراب
انتي عارفة؟ الحاجة الوحيدة اللي بنعرف نعملها في البلد دي اننا ناخد
ندوس
نجيب الاكل
الفلوس
نبيع
كل الافعال اللي فيها اخد بنتقنها قوي
مبنعرفش ندي
نوهب
نتنازل
كلنا كده يا اميرة
حتى احلامنا في اغلبها فعل الاخد
ناس قليلة قوي زيك كده كانت بتحلم تدي
كام حد تسأليه بتحلم بايه يقولك بفلوس ببيت بمنصب
كام حد سألتيه تحلم بايه قالك يساعد حد محتاج
يكفل يتيم
يبذل مال
يسافر في حملة اغاثة
ضحكنا على نفسنا بشوية قيم مبنعملش بيها
بنرددها ونعمل عكسها
بنقول على بعض الظن اثم وبنمشي بمبدأ حرص ولا تخونش
انهرده اكتر من خمسة اعرفهم اتصابوا اصابات سيئة جدا
ومنهم ناس بين الحيا والموت
عارفة
في كل ده مش صعبان عليا قوي قد الدكاترة
تفتكري وهم بيعالجوا المصابين بيفكروا دول معارضة ولا مؤيدين؟
بيقولوا دول ثوريين ولا مدانين؟
كمية الدم اللي بتتحنا بيها كفوفهم دي
احكيلك اننا بقينا بنخون بعض؟
اني انا وابويا في بيت واحد يا نتخانق يا منتكلمش
ان اخوات متفقين اللي يقابل التاني في الميدان يقتله؟
للبنى بتقول "متقتلوش ولادي"
وانا  يا اميرة بقول متقتلوش ولادي
الغباء بيقتل ولادنا
انا بقيت اما ابص في وش حد اعرفه بدال ما اشبع منه احاول احسب هيموت امتى
كل الدم حرام يااميرة
كل الدم حرام
وانتي  ارتاحتي
واحنا مبنرتاحش
نعالج قلوبنا المعطوبة دي ازاي يا اميرة
الروح المعيوبة دي نرجعها زي زمان ازاي؟
كل اللي  فاهماه دلوقتي
ان نص اللي اعرفهم بيصوتوا وبيحللوا وبيحاولوا يتابعوا ويبقالهم موقف
والنص التاني
ربع منفصل تماما وشايف اللي بيحصل ميخصوش
وربع _وانا منهم_ مخروس ومش عارف يتكلم
وشايف ان اي كلام هيبقى ابتذال للي بيحصل
بقت كل اوقاتنا حداد يا اميرة..كل الزمن حداد
ملعون ابو دي ليلة نمت فيها .. وصحيت ملقتش بلدي

هناك 3 تعليقات:

Ahmed Ismail يقول...

هيه مين اميرة ؟
انا حاسس انى حبتها من كلامك عنها

مسلم مصرى يقول...

ربنا ينجى شبابنا من الفتن
وانا زيك ساكت :(
تحياتى المعطرة

حنان الشافعي يقول...

http://slalem.blogspot.com/

دي اميرة