ماشية بقى..ومش راجعة!

وعشان كل حاجة تكمل صح..أستودعكم الله.. :)
أنا اللي هسافر وحدي .. وهودع من غير ما أسلم :)))

بطلوا نفاق بقى

ومن أكبر الأسباب اللي كانت مخلياني سايبة المدونة
العاهات اللي مبتعرفش غير انها ترص شوية كلام سخيف جمب بعضه عشان تجامل حد/أي حد حتى لو كانت جملة "ريان يا  فجل" أبلغ واجمل من اللي بيقوله
معنديش مانع من المجاملة/التشجيع....بس يخربيت النفاق يعني!!
ملحوظة مجعلصة..انا نفسي مبحبش التعليقات اللي فيها مدح فج لأي نص بكتبه..مش بكتب وحي انا_استغفر الله العظيم.


ارتقوا بقى..المفروض انكم الجزء المثقف  من الشعب..متحسسونيش انكم الجزء اللي راح السايبر يدخل شات روومز فوقع في بلوجر!!!


"طبعا الكلام مش للكل"
"وطبعا مش المقصود الإهانة للي موجهلهم الكلام"
"وطبعا محدش معصوم..وانا اولكم"
مزيكا تضيع القرف اللي فوق

حدوتة المزيكا المصبوغة بشوية شجن

احكيلك حدوتة؟

كان ياما كان

ياسعد يا اكرام

كان في مزيكا

حلوة قوي

وحرة

فضلت تلف الكون عشان تتسمع

ومحدش كان بيسمعها ابدا ابدا

محدش كان قاصد بس..مكانوش يعرفوا انها موجودة

عارف ليه؟؟

عشان كانت بتسافر في طبقات الجو اللي فوق خالص دي..اللي بيسافر فيها الصوت من غير  ما يتسمع

بس المزيكا كانت حلوة قوي

حلوة لدرجة خلت طبقات الجو اللي هي عبارة عن فراغ اصلًا تحس بيها

فهمتها وعرفت ان جمالها مش ليها وان كل اللي تتمناه انها تتسمع

قامت ضيقت عليها المكان وطردتها..طبقات الجو المليانة فراغ كان قصدها تبعتها للسحاب وهو هيكمل المهمة

لكن المزيكا مفهمتش..وزعلت..وبقت مصبوغة بشوية حزن..أو تقدر تقول شجن

نزلت للسحاب..انبهر بيها قوي..وعشان السحاب بيحب يعيط شتا..فهم الشجن اللي في المزيكا..وحبه جدًا كمان

المزيكا فضلت تسافر بين السحاب وهي ضايعة ومش فاهمة انها بقت مزيكا جميلة مع شوية شجن..يعني بقت اجمل مزيكا في الكون

بعد شوية السحاب خاف عالمزيكا تموت قام عصرها وفتفتها وعيط شتا وبعتها لكل الأرض

المزيكا نزلت الأرض واتسمعت..واللي محبش الشتا..هي اتبخرت عشانه وبقت هوا وسكنت بعد قفص الضلوع بشوية

 فضلت المزيكا عايشة كل السنين اللي فاتت وهتفضل عايشة طول ماهي بتتسمع

وتوتة توتة خلصت الحدوتة

موسيقى الحدوتة في السطر قبل اللي فات،

in london town

foggy day

Cocaine Blues

your name isn't jack brown

يمكن أطلع منك بيك

زغزغني يمكن ينفع أرجع أسمع دقة قلبي تاني وأعيش


كالعادة..افعص الجملة السابقة عشان تسمع

فَعْص

كَانَتْ هُنَاك _عَلَى الحَائِط_ فَرَاشٌة ، جَنَاحٌ يُرَفْرِفُ فِي الهَوَاءْ..وَالآَخَرُ مَفْعُوصْ.

موسيقى الحدَث / اضغط على الجملة السابقة لسماع الموسيقى

تدوّر وترجع وجع واعتكاف وتطبع عليك السنين العجاف

حتى الملاك صدّك


اضغط  عالجملة اللي فاتت عشان تسمع

اخر حدوتة

كان في بنت بتحكي حواديت حلوة



وبطلت.

حكاية البلكونة وسبع حبال الغسيل والهدوم

كان يا ماكان
يا سعد يا اكرام
ما يحلى الكلام
الا بذكر النبي عليه الصلاة والسلام


كان في مرة..بلكونة..وسبع حبال غسيل..وشوية هدوم، عايشين في بيت مع اسرة لطيفة ومنظمة..أسرة ملتزمة ومتزمتة في كل ما يتعلق بالأخلاق،


كل يوم..لما كان حد بيغسل الهدوم وينشرها..كانت التعليمات واضحة،
القصير قدام والطويل ورا،..الأبيض مع بعض..الغوامق مع بعض..الفواتح مع بعض،
البنطلونات تتنشر من فوق مش من الرجلين..القمصان من تحت مش من اللياقة..التيشيرتات جمب بعضها ومتتشدش قوي عشان متبوظش، الغيارات ورا..أو يستحسن جوه البلكونة مش عالحبال، 


التعليمات كانت مهمة..والا..الجيران هيتريقوا على غسيلنا!


في يوم..حصلت مشاغل كتيرة قوي في البيت، والنظام اتنسى خالص،
الغسيل مبقالهوش قواعد كل حاجة اتغيرت


محدش ركز ولا اهتم..بس كان في بنت بتحب الرسم..اكتشفت توليفات جديدة من الألوان عمرها ما كانت هتشوفها طول مالابيض مع بعضه والالوان اللي شبه بعضها مع بعضها
وكان في ولد بيحب التصوير  في العمارة اللي في وشهم .. صوّر لقطات غريبة لأشكال الغسيل من رؤيته هو ودخل بيها مسابقة عالمية وكسب،،
الألوان بهتت على بعضها أغلب الوقت..والعيلة دي بقت مشهورة بألوان لبسهم الجميلة اللي مفيش زيها


مع الوقت..حصل تناغم ذاتي ما بين الهدوم..ومحدش من الجيران اتريق ولا حاجة
ده  حتى كل الناس في الشارع بتاعهم بقت بتنشر الغسيل من غير تعليمات ولا قواعد


والأجمل..إن الهدوم بقت أسعد..في روح حلوة ما  بين الهدوم وبعضها انتشرت..وكل لون شاف نفسه اجمل  جمب لون تاني
والبلكونة والحبال كانوا  الطرف الأسعد في اللي بيحصل..كانوا بيحضروا كل اللحظات الجميلة اللي مبتتكررش واللي بتتكرر..وكمان كانوا موجودين في كل ا لأحدداث بشكل ما




وتوتة توتة
خلصت الحدوتة
حلوة..؟ ولا ملتوتة؟

الولد اللي عاش طول عمره يكلم الموج والسما

كان يا ما كان
يا سعد يا اكرام
ما يحلى الكلام ..الا بذكر النبي عليه الصلاة والسلام

كان في ولد عسول

وحليووة

عايش في البحر

كان بيحب البحر قوي

لدرجة انه ميقدرش يعيش من غيره

الولد ده كان عايش على صيد السمك

وقارب

وكوخ صغنون بينام فيه

كان لوحده

بس كان مصاحب كل دول

والسما والموج

كان بيفضل يصطاد طول النهار

ويطلع ياكل

ويكلم الموج والسما

ويرسم عالرمل

وفضلت حياته ماشية كده

تمام

مش حاسس ان في حاجة ناقصاه

لحد ما في يوم

كان قاعد بيكلم الموج

لقى بنت طالعة من وسطيه

افتكرها جنية

صرخ وطلع يجري زي الطفل المفزوع

ولما اكتشف انها بنت مش جنيّة

وقع في غرامها في الحال

دخلها الكوخ

قالتله انه صغير

كره الكوخ

خدها البحر واكلها من السمك بتاعه

قالتله انت كل يوم تاكل سمك بس؟

ابتدا يشتاق للملوخية والفراخ والبامية واللحمة والفول

باختصار

حس ان في حاجات كتيرة ناقصاه

وعشان كان بيحبها قوي

كان نفسه يعملها كل حاجة تتمناها ولنفسه معاها

وف يوم

خد مركبه وراح في قلب البحر

ورمى البنت اللي كان بيحبها مكان ما لاقاها

وهي سابته مندهتش عليه

حس بالذنب شوية

قام قالها اصلي مش هعرف اعمل كل حاجة

ابتسمت وقالتله عادي

بكرة

تفكيرك هيتغير

مشي ومبصش وراه

راح عاش في الكوخ

بياكل سمك كل يوم

وبيكلم الموج والسما

ولسه لوحده

توتة توتة خلصت الحدوتة

البنت اللي بتحب اللاب توب بتاعها

كان ياما كان
يا سعد يا اكرام
ما يحلى الكلام
الا بذكر النبي عليه الصلاة والسلام


كان في بنوتة .. حلوة..زي كل حدوتة، البنوتة دي كانت وحيدة..وحيدة قوي يعني، مع ان عندها صحاب كتيييير ومعارف اكتر، بس نقول ايه..فقرية 


المهم..البنوتة الحلوة دي..كان عندها لاب توب lap top ، كانت بتطل عالدنيا منه..تسمع حكاوي كتير قوي..وتسمع مزيكا..وتشوف افلام وتقرا كتب وحواديت ومقالات ولغات وعلوم في كل المجالات..باختصار..اللاب توب بتاعها كان دنيتها..مكانتش بتبقى وحيدة وهي معاه..عشان كده أغلب الوقت كانت معاه،


واحدة واحدة..نسيت ازاي تتكلم..وازاي تغني..وازاي تضحك..غير للاب توب،
ومن كتر حبها فيه..عملتله كل حاجة بيحبها..حافظت على صحته وحطيتله انتي فايرس..جابتله كل البرامج اللي بيحبها..مليتله الدنيا ورد وفراشات شموع وحاجات حلوة..،
لحد ما جه وقت..ابتدت تحسه مبيردش عليها..وكل حاجة فيه متكررة ومملة..خافت قوي..ونامت طول الليل تعيط..


تاني يوم الصبح اما صحيت..راحت تصبح عليه كالعادة وتصالحه..حتى لو هو اللي غلطان .. اول ما فتحته..لقيت حاجات كتير متغيرة..الديسك  توب صورة بوكيه ورد حلو..وبدال نغمة تشغيل الويندوز الكئيبة..لقيت مزيكا حلوة قوي شبه اللي بيسمعهالها صاحبها إله المزيكا..وبرامج جديدة..وحاجات حلوة في كل ركن من اركان اللاب،
فكرت كتير..لقت انه مستحيل يكون اللاب عمل ده كله لوحده..يكون لبسه عرفيت مثلًا..؟ لا برضه، بس .. يبقى حد هكّر على جهازها وبيعمل كده..واكيد اكيد حد بيحبها وعايزها سعيدة،


عجبتها الفكرة المرة دي..وصدقتها..وكل يوم تسرح شعرها..تلبس حلق مع انها مبتحبهمش..تلبس لبس جميل وتقعد عاللاب..مرات تسمع مزيكا..مرات ترقص.مرات تبص للكاميرا وتبتسم كأنها شايفاه..صدقت لدرجة انها استنته كتير قوي عشان يجيلها
كتبتله رسايل في ملفات word  وحضنت اللاب قوي لدرجة انها سمعت طقطقة مفصلاته لما حست انها محتاجة حضن،
وكتير خلته مش واخد باله وبعتتله بوسة في الهوا..ماهو مبيبوسهاش ابدا!


وفي يوم..كانت بتسمع مزيكا حلوة قوي بعتهالها مخصوص صاحبها إله المزيكا..بس صوتها كان واطي بشكل يضايق، فضلت تعلي في الصوت ميعلاش
اتنرفزت..خبطت اللاب على دماغه..مفيش فايدة..فكرت شوية كده..قالتله لو سمحت علي الصوت..معلاهوش بردك، عيطت...مفيش فايدة..حلفت ما هتضحك ولا هتحضنه ولا هتبوسه تاني..مفيش فايدة،


قعدت 3 ايام مبتفتحش اللاب..ولا اي حاجة اتغيرت..صحيت يوم من النوم..ضحكت..وجريت عاللاب فتحته..بصت للكاميرا وقالتله .. صباح الخير .. انا عارفة ان دي غيرة  .. كنت قول على فكرة..وباسته وقالتله انها بتحبه..وعمرها ما هتبقى وحيدة وهو معاها،

البنت اللي كل ما تسمع حد بيقول انه حصله حاجة تحصلها

كان في بنت حلوة

كل ما تسمع حد بيقول انه حصله حاجة

غصب عنها تحصلها

وعشان الناس بتحب تتكلم كتير عن الحاجات الوحشة

كانت بتحصلها حاجات كتير وحشة

طنط منال السمرا اللي فوقيهم فسخت خطوبتها وحكيتلها..قالتلها لما بعيط الدموع بتحرق جفوني

نزلت بيتها عيطت والدموع حرقت جفونها

صاحبتها كتبت نوت عن ان ايديها جلدها بيتشقق ويقع

قامت اكلت معاهم وجت تغسل ايديها لقت ايديها بتتشقق

وعشان الناس بتحب الحزن والوجع فضلت موجوعة كتير قوي

لحد ما جه ولد شرير يشوف البنت الغريبة دي

ولانه مش بيهتم بانه يعمل مصايب للي عندهم مصايب اصلا

فمكانش مهتم في الاول

وبعدين قال ليه ميحاولش يخلي حالتها اسوأ؟

فضل يجرب فيها

عمل نفسه واحدة صاحبتها هي بتحبها قوي

وقعد يقول قدامها..انا بعيط..أنا حزينة..انا هعور نفسي..انا هرمي قطتي في الشارع 

وفضلت البنت الحلوة تعمل الحاجات دي وتحصلها حاجات وحشة كتيرة لحد ما تعبت قوي اكتر

وكانت بتتمنى تموت

قام الولد الشرير فرح قوي قوي

واتبسط بالنتيجة اللي وصلها

قام قال بصوت عالي..دي نتيجة تخليني مبسوط للأبد ومفيش أي حاجة تقدر تغير ده

والبنت سمعته..ولوحدها كده بقت مبسوطة للأبد ومفيش حاجة عرفت تغير ده لحد ما ماتت وهي مبسوطة قوي

حنّاء

                                              يحكي أنّ..

كان هناك امرأة ترسم الحناء للفتيات

قررت أن تكون عرافة

أخبرت الفتاة أن فتًى يريدها

والفتاة كانت تعرف أن القلوب ملعونة

ولأنها كانت تعشق الله وقت الأذان

فقد صدقت بأن التنجيم حق

وضمت إليها قلبًا يذوي

لكنّ الله خبرها بالطريقة الصعبة

أن ماأحبت..سيزول بعد أيام قليلة

فالعرافة تكذب..وترسم الوشوم بحناء مغشوشة،

كن بخير

كن بخير .. 

هكذا

            كلنا نفعل يا عزيزي..كلنا نفعل...

حبيبي..شريف

حبيبي شريف باشا البارودي..


وها أنا ذا أقولها أيضًا..لست غريبة الأطوار .. وما جال بخاطري عن حبك لم يكن وهمًا،


هل تعلم أنني كنت سأترك كل شئ وأهرب..لا من حرِّ الصيف القادم..ولا حنينًا إلى انجلترا..ولا سير تشارلز/الذي في مقام والدي العزيز،


أنا أحبك..ورسالتك أنجدتني..، أنا أحب رسالتك أيضًا،


أي اعتبارات وموانع تلك التي تقف ضدنا؟؟ أنت  تحبني..هل تدرك ذلك.. .؟ أنت تحبني، ولا شئ آخر يهم، 


حبيبي شريف..لن أكتب لك شيئًا آخر..سآتي إليك...أو نذهب سوياً.
                    
                                                                  حبيبتك/حنان الشافعي


تلك التي ليست بــليدي آن .. ولا انجليزية..ولا تملك شعرًا ذهبياً وزوجًا من العيون البنفسجية،
ولكنها تمتلك عينان بكتا حينما قرأت رسالتك المفاجئة..التي انتظرتها كثيرًا.




*راجع رواية خارطة الحب لأهداف سويف.

ورقة رسم ملونة بالأحمر

‎*في امتحان الرسم للصف السادس الابتدائي عام 2050:

"قامت في مصر حركة معارضة جماعية حاولت القيام بثورة 

عظيمة،غير أن الثوار جميعهم إما استشهدوا وإما ضاعت أعينهم 

وإما أصيبوا اصابات أقعدتهم وإما اعتقلوا، 

استخدم التعبير الفني في وصف تلك الحقبة الزمنية، مستخدمًا 

الخيال والألوان الجميلة، واصفًا الروح التي سادت في تلك الفترة."

*في لجان التصحيح..أوراق الطلاب جاءت مصبوغة كلها باللون 

الأحمر.

*في أحد المعتقلات .. يعاني الآن واضع امتحان الرسم من تدهور 

صحته بعد أن أمضى عشرون عامًا في المتقل.

*أبعث لكم بتلك الرسالة وأنا في طريقي إلى اللامكان..لاتنسوا من 

ماتوا قديمًا من أجل الحر..الحر...الحـــ .. الــ...ااااااااا...............

مبسوطةٌ أنا :)

أن تكون سعيدًا للغاية 

فتلوّن كل الكون بالبرتقالي..

حتى يشرق الكون كله مجتمعًا..في لحظة واحدة.