كونها مينا
للمراكب والسفر
وأكتر شيء ثابت فيها الهِلب
مبيخليش البعد سهل بالمرة
ولا الفراق عمره أصبح روتين
مراكب خارجة
مراكب داخلة
كونها مينا
عزز احساسها بقيمة اللي يدخل ويرسا
وحتة القلب النونو اللي بتختفي مع كل مسافر
العبارات علمتها
إن كتر المشاورة في الوداع
مش هتحمي اللي ركب البحر
كان أولى بيه يفضل عالبر
ويقدّر الايدين
اللي بتتوجع كمحاولة أخيرة لإظهار التضحية
كونها مينا
علمها إن السفر والفراق
بيوجعواالبني ادم
والحيوانات والمراكب
وحتى الصناديق الكبيرة المليانة لعب صغيرة
وان الطفل اللي بتجيله لعبة
جاية من السفر
بيطعموه الاغتراب مع اللعب
كونها مينا
علمها تستحمل الحركة الرتيبة المؤلمة للموج
وتقدرها
اكمنه الوحيد اللي بيلف ويرجع تاني
هناك تعليق واحد:
اكمنه الوحيد اللى بيلف ويرجع تانى
تحياتى :)
إرسال تعليق