الأحد، 21 أكتوبر 2012

عن الكمال

انهرده _دلوقتي عشان أكون محددة أكتر_ مبسوطة وحاسة بكمال غير طبيعي،،
بفكر في كل الناس اللي قابلتهم في حياتي
كل اللي غيروا مفاهيمي عن الجمال والكتابة والمزيكا والفن 
كل اللي ساعدتهم وكل اللي  _زي ما عمرهم هيفهموا_ ساعدوني
كل اللي كدبت عليهم وصدقوا بس عشان بيحبوني
وكل اللي كانوا فاهمين نفسهم فاهمين كل حاجة وعمرهم ما فهموا ولا عمرهم هيفهموا..
متشكرة دي بعمق ، جايز كتير بكون متقلبة ومش مفهومة او حتى ساكتة .. بس دلوقتي
i'm feeling complete 

ينفع اقولها كده؟ معرفش بس انا كده

مبحبش في قصة حب عشان الفضول .. ومش زعلانة من اكتشافي اني عمري ما حبيت .. ولا من احتمال اني عمري ما هحب .. 
انا كاملة بيا . . كاملة بأجزائي اللي بديها بارادتي لناس حلوة حواليا ، انا دلوقتي حواليا ناس كتيير  حلوة عمر عيني ما شافتهم


اورفيوس والخطيب والكبير وايفانهو وزبيدة ولولي وايفا وخوخة وفروتي وتشي وراندل والبابا و سمسم واالميس وميرو ودودو وكافكا وناس أكتر كمان

انا كاملة عشان كل فتافيت قلبي اللي معاهم في مكانها مبتضيعش
وعشان كل واحد عارف فيهم لما يجي معاده انه مش هيطمع وياخد فتفوتة من قلبي معاه وارجع احس اني ناقصة..مش كده أأمن وأحسن؟

كنت بقولها إني لا أجيد التعلق ولا التورط ولا الانضمام ، وفي حكاوي معينة كنت ديما بتفهم غلط .. وانا مبحبش اشرح وابرر..بالتالي اتحطيت وحطيت في اماكن غلط ..ده ميزعلش 
خصوصا لو وصلت زيي لمرحلة من الكمال تخليك متزعلش عاللي راحوا وتستوعب اللي هيروحوا..ماقلنا كاملة بنفسي :)

مش غرور .. بس استيعاب لكل حاجة حصلت وكل حاجة وجعتني
وكل حاجة علمت في جلدي .. 

مبسوطة ومرتاحة للأبد .. هكتبلكم حاجات حلوة .. وابتديت فعلا في خطوات نشر الكتاب .. وهيكون مفاجأة .. مش بس في توقيته وظروفه .. لا ونوعه كمان :) 

لكل الناس اللي حبوني وانا معرفتش ارد الحب ده .. متزعلوش .. مش مكاننا سوا .. انا كمان بحب ناس ومش بيبادلوني الحب

انا مش معترفة بالحب كمفهوم كل الناس بتتكلم عنه .. بسميه "المشاعر الطيبة" بس جملا بختصر واقول حب .. الحب اللي عندي غير حب أي حد .. حتى زبيدة.. مع انها الوحيدة اللي تعرفه

كان في ناس كنت زعلانة على فراقهم قوي .. وناس ياما بكيت وتعبت نفسيا  بسبب بعدهم عني .. ناس ظلموني .. ناس مفهمونيش .. ناس افتكروا انهم هيعرفوا يحطولي خطة ومسار امشي عليه .. للناس الاخرانيين احب اقول .. اللي متعرفوهوش اني قريت الخطة ومشيت عليها عشان تصدقوا نفسكم وافضل انا اضحك عليكم انكم مش فاهمين حاجة لحد اخر لحظة .. صباح الفل  :) والبحر يشهد ، للناس اللي قبلهم .. بقيت متعادلة بجد .. معرفش بقى نسيت ولا ايه .. بس الاكيد اني مسامحتش .. هو هياخدلي حقي :) 

للناس اللي غلطت في حقي  .. وشتمت علنا وسرا .. لأي حد حلل لحمي لأكله .. هنتقابل في الأعراف :) 

للناس اللي طلعتهم بره حيياتي وقلبي قريب .. انا عارفة اني ظلمتكم .. بس انا فعلا مبعرفش اجامل .. مبعرفش احب حد مبحبوش ففي الحقيقة.. وكوني "لطيفة" ممكن يخليني افضل اجي على نفسسي كتير عشان محرجش حد فيكم .. بس معودتش لطيفة..معودتش بستحمل .. أنا اسفة .. انا اهم كتير .

للناس اللي دخلوا حياتي "الخاصة" قريب .. انتم فاهمين .. مبسوطة بيكم قوي :)

للرب والأب الغايبين عني .. انا عارفة طريقي..بالمعنيين مع اختلاف المستقبل 

ليا .. لسه كتير .. خدي نفس عميييييييييييق وامسكي كويس..واتعلمي ان زي ما لازم تمسكي كويس ..لازم تسيبي .. ولازم تقعي كمان

سَلَامٌ وإن أَوْجع.

هناك 7 تعليقات:

momken يقول...

.....

الله عليكِ
جامد اوى البوست ده
واجمل ما فيه انطلاقه وعفويته وصدقه

البوست ينفع روشته لاغلب المرضى النفسين والمنفسنين...ومحترفى الودوده
وسيىء الظن

عجبنى اوى اوى اعلانك بكل ثقه انا كامله بنفسى وكأن ثقتك بالله وصلت من اليقين الى حد الملموس

تسلم ايدك استاذه حنان

تحياتى

....

طارق هلال يقول...

وكأنها رسالة وداع؟!

يا ترى هتركبي المركب، وللا حطيتي الناس فيها وزقتيها في البحر؟!

لبنى أحمد نور يقول...

حلوة ومكتملة كده ازاااي ^^
فيه حاجات كتير عايزة أعلف عليها بس مش هعلق
مبرووووك مقدمًا على الكتاب
اللي عارفة إنه هيكون مختلف وفريد من نوعه
الصدق بيحلي الكتابة.. انتي صادقة حتى وانتي بتكدبي

حنان الشافعي يقول...

ممكن
.....
النبي فرحتني
نورت :)
,,,,,,,,,,,,,,,,,,,,,,,,,

طارق
....
هِيَّ رسالة وداع.
,,,,,,,,,,,,,,,,

لبنى
....
huuuuuuuuuh

غير معرف يقول...

:)




حنان الشافعي يقول...

غير معرف

مين؟؟

غير معرف يقول...

:)