السبت، 13 أكتوبر 2012

مينا


كونها مينا
للمراكب والسفر 
وأكتر شيء ثابت فيها الهِلب
مبيخليش البعد سهل بالمرة
ولا الفراق عمره أصبح روتين
مراكب خارجة 
مراكب داخلة

كونها مينا
عزز احساسها بقيمة اللي يدخل ويرسا
وحتة القلب النونو اللي بتختفي مع كل مسافر
العبارات علمتها
إن كتر المشاورة في الوداع
مش هتحمي اللي ركب البحر
كان أولى بيه يفضل عالبر 
ويقدّر الايدين
 اللي بتتوجع كمحاولة أخيرة لإظهار التضحية

كونها مينا
علمها إن السفر والفراق
 بيوجعواالبني ادم
 والحيوانات والمراكب 
وحتى الصناديق الكبيرة المليانة لعب صغيرة
وان الطفل اللي بتجيله لعبة
 جاية من السفر
بيطعموه الاغتراب مع اللعب

كونها مينا
علمها تستحمل الحركة الرتيبة المؤلمة للموج
وتقدرها
اكمنه الوحيد اللي بيلف ويرجع تاني

هناك تعليق واحد:

مسلم مصرى يقول...

اكمنه الوحيد اللى بيلف ويرجع تانى
تحياتى :)