الاثنين، 8 أكتوبر 2012

مُرّ بــعَشَم


عن قهوتي
مُرّة في كوباية كبيرة
معلقة سكر واحدة
عشان المرار في العَشَم
مش في الشَبَع،
بشربها في أسوأ حالاتي
دايمًا
الشجن محتاج سِنّة وَجَع
أول بُق لازم يلسع لساني
ليه؟
انطق كده كلمة
زَهَقْ
بلسان ملسوع؟
غَلْوِش على كل حاجة
عن قهوتي
من غير وش
لا بتبتسم ولا عاقدة الجبين
والكوباية عشان متلاقيش شيء ينقرا
بتكفي الإشارات الكدابة
الباقي
مشروب على مهل
فاتر..زي عدمية الحب والثقة
مُرّ..ما انت اتعودت على العشم،
خَرَّمت قلبك
ومفيش حَلَق
بطيء..كما أيامك السودة على الأرض
آخر بُق..
سؤال..
لما أنت قرفان منها قوي كده..
ليه بتصدق في "حياة" تانية بعد الموت،
ما كفاية خدع رخيصة!
في النهاية..
الكوباية ..ببواقي السَخَط عالجدران
.. برميها عالمكتب،
جايز النمل اللي بياكل في الكتب
يبطل يجي ،
نمل بيحب السكر..
هيعجبه المرار في إيه؟!

هناك 5 تعليقات:

غير معرف يقول...

ربما يحب النمل المرار كما يحب الكتب التي يأكلها
ربما تحب القهوة الا يتم وضع عليها سكر
ربما أشياء كثيرة
أكثر مما تتخيلي أحيانا كثيرة

حنان الشافعي يقول...

غير معرف


آه وبعدين يعني؟؟
ايه الجديد؟
أؤمر!

طارق هلال يقول...

لا تفسر الحلم ولا تعيش تأويله
لا ترسمه على هواك ولا تحلم بغيره
الحلم لو مش في طريقك نوره أو ضله
ايه هيبقى في سكتك غير حفرة أو سكة غربة؟

حنان الشافعي يقول...

طارق هلال
....

أنا عندي حفر آه، أحلام لا :)

مسلم مصرى يقول...

كلام زى الأحلام