الأربعاء، 27 يونيو 2012

حدوتة المزيكا المصبوغة بشوية شجن


احكيلك حدوتة؟

كان ياما كان
ياسعد يا اكرام
كان في مزيكا
حلوة قوي
وحرة
فضلت تلف الكون عشان تتسمع
ومحدش كان بيسمعها ابدا ابدا
محدش كان قاصد بس..مكانوش يعرفوا انها موجودة
عارف ليه؟؟
عشان كانت بتسافر في طبقات الجو اللي فوق خالص دي..اللي بيسافر فيها الصوت من غير  ما يتسمع

بس المزيكا كانت حلوة قوي
حلوة لدرجة خلت طبقات الجو اللي هي عبارة عن فراغ اصلًا تحس بيها
فهمتها وعرفت ان جمالها مش ليها وان كل اللي تتمناه انها تتسمع
قامت ضيقت عليها المكان وطردتها..طبقات الجو المليانة فراغ كان قصدها تبعتها للسحاب وهو هيكمل المهمة

لكن المزيكا مفهمتش..وزعلت..وبقت مصبوغة بشوية حزن..أو تقدر تقول شجن

نزلت للسحاب..انبهر بيها قوي..وعشان السحاب بيحب يعيط شتا..فهم الشجن اللي في المزيكا..وحبه جدًا كمان

المزيكا فضلت تسافر بين السحاب وهي ضايعة ومش فاهمة انها بقت مزيكا جميلة مع شوية شجن..يعني بقت اجمل مزيكا في الكون

بعد شوية السحاب خاف عالمزيكا تموت قام عصرها وفتفتها وعيط شتا وبعتها لكل الأرض

المزيكا نزلت الأرض واتسمعت..واللي محبش الشتا..هي اتبخرت عشانه وبقت هوا وسكنت بعد قفص الضلوع بشوية


وتوتة توتة خلصت الحدوتة
موسيقى الحدوتة في السطر قبل اللي فات،

هناك 8 تعليقات:

أحمد أحمد صالح يقول...

جميلة جدا الخاطرة.و يمكن انا شفت المزيكا دي في حاجة معينة يمكن تكون رؤيتي و فهمي ليكي صح..و يمكن شفت فكرة تانية برضة صح !!
..و طبعا جميلة المزيكا..تحياتي

حنان الشافعي يقول...

أحمد صالح
.......
منور والله :)

دي حدوتة مش خاطرة :)

بالنسبة لفهمك وشوفك..انا شخصياً مفهمتش انت عايز تقول ايه :D

المهم ان المزيكا عجبتك واحتمال الحدوتة :)

نورت

حنان الشافعي يقول...
أزال المؤلف هذا التعليق.
richardCatheart يقول...

يخربييييييييييييت كدا يا حنون ررررررررررررررراعه وراااااااااااائع ثردك بالطريقه دى اووووووووووووووووووى انتى ممتعه اوووووووووووى

مصطفى سيف الدين يقول...

جميلة جدا
المزيكا كالماء الذي يعصره السحاب فهي تهبط علينا من السماء فهي تتميز بالطهر و النور
و المزيكا كالهواء الذي يتبخر من بحور حوت الغموض و الكنوز ما زالت تحمل سحرها طيلة الأعوام
المزيكا كالماء و الهواء لا نستطيع الحياة بدونها
روعة يا حنان

حنان الشافعي يقول...

ماروز
.......
هو انا كل حاجة بكتبها بتعجبك كده بجد؟
اصلك دي بالذات حسيت انها مكررة
حبك ياموزة


...
أ.مصطفى
.....
تسلم يارب :)
نورتني

الازهرى يقول...

لا

دى سكنت جوه الضلوع
ولفت جوه الحنايا
وملكت قلب موجوع
وغمرت دموع الصبايا

http://www.youtube.com/watch?v=7BwxkyYwUlo

ღ أحاسيس آيـــوشـه ღ يقول...

جميلة جدا جدا ياحنون كل يوم بقيت اجى اقرا حدوتة قبل النوم دا بقى ادمان على فكرة :)
واقولك على سر حواديتك هى اللى خلتنى ارجع اكتب تانى