الخميس، 21 يونيو 2012

البنت اللي كل ما تسمع حد بيقول انه حصله حاجة تحصلها

كان في بنت حلوة
كل ما تسمع حد بيقول انه حصله حاجة
غصب عنها تحصلها
وعشان الناس بتحب تتكلم كتير عن الحاجات الوحشة
كانت بتحصلها حاجات كتير وحشة
طنط منال السمرا اللي فوقيهم فسخت خطوبتها وحكيتلها..قالتلها لما بعيط الدموع بتحرق جفوني
نزلت بيتها عيطت والدموع حرقت جفونها
صاحبتها كتبت نوت عن ان ايديها جلدها بيتشقق ويقع
قامت اكلت معاهم وجت تغسل ايديها لقت ايديها بتتشقق
وعشان الناس بتحب الحزن والوجع فضلت موجوعة كتير قوي
لحد ما جه ولد شرير يشوف البنت الغريبة دي
ولانه مش بيهتم بانه يعمل مصايب للي عندهم مصايب اصلا
فمكانش مهتم في الاول
وبعدين قال ليه ميحاولش يخلي حالتها اسوأ؟
فضل يجرب فيها
عمل نفسه واحدة صاحبتها هي بتحبها قوي
وقعد يقول قدامها..انا بعيط..أنا حزينة..انا هعور نفسي..انا هرمي قطتي في الشارع 
وفضلت البنت الحلوة تعمل الحاجات دي وتحصلها حاجات وحشة كتيرة لحد ما تعبت قوي اكتر
وكانت بتتمنى تموت
قام الولد الشرير فرح قوي قوي
واتبسط بالنتيجة اللي وصلها
قام قال بصوت عالي..دي نتيجة تخليني مبسوط للأبد ومفيش أي حاجة تقدر تغير ده
والبنت سمعته..ولوحدها كده بقت مبسوطة للأبد ومفيش حاجة عرفت تغير ده لحد ما ماتت وهي مبسوطة قوي

هناك 12 تعليقًا:

غير معرف يقول...

خلتينى ابتسم غصب عنى


ينفع كدة يعنى ها

(((:

اهوها هتابع ها ((:

Hanan Elshafey يقول...

غير معرف

انا مش عارفة انت مين
بس مبسوطة انك مبسوط
اه والله

O.M يقول...

اهم حاجة انهابقت مبسوطة للابد ....[جد اقصوصة حلوة و اسلوبك السلس و الجميل كنت حاسه انى سامعه صوتك و انتى بتحكيها :)
احييكى

Hanan Elshafey يقول...

حرية محمد
انا مبسوطة انك اتبسطتي
بجد والله
تعالي كل يوم احكيلك حدوتة

rona ali يقول...

يخربيت كده

هى اينعم تحسيها كده قصه طفوليه بريئه بس بتحمل حاجات كتير اوى واينعم المفترض اضحك
بس انا داينا بستقبل الشئ بشكل مختلف علشان كده دمعت :)))

أميرة يقول...

ابداااااااااع الفكرة جميلة واسلوبك جميل جدا

أسماء علي يقول...

حلوة أوي .. الفكرة جبارة
وانبي عقدتيني :))

يومك ورد

Hanan Elshafey يقول...

رونا
سلامة عيونك م الدموع ياقمري :*
نورتيني
تعالي كل يوم في حدوتة
............
اميرة
وجودك هو الاجمل..نورتيني ياقمر
................
سمسم
احنا نقول ايه ولانيجي ايه جمبك بس
يومك نور يا سمسمتي :*

richardCatheart يقول...

ههههههههههههههههههههههههه مجنونه وبحبك كلنا هانموت المهم انها ماتت مبسوطه

Hanan Elshafey يقول...

ماروهاتي
بحبك لاخر الدنيا
ضحكتك دي عندي بفرحة كبيرة جوات قلبي :*

عاشقة القمر يقول...

حلو انها ماتت مبسوطة .. بس هو اللي كان المفروض يموت من الغيظ والفرسه :)

Hanan Elshafey يقول...

عاشقة القمر
ههههههههههههه
تعليقك ضحكني
ربنا يضحكك زي ما ضحكتيني ^_^
نورتي