السبت، 23 يونيو، 2012

حكاية البلكونة وسبع حبال الغسيل والهدوم

كان يا ماكان
يا سعد يا اكرام
ما يحلى الكلام
الا بذكر النبي عليه الصلاة والسلام


كان في مرة..بلكونة..وسبع حبال غسيل..وشوية هدوم، عايشين في بيت مع اسرة لطيفة ومنظمة..أسرة ملتزمة ومتزمتة في كل ما يتعلق بالأخلاق،


كل يوم..لما كان حد بيغسل الهدوم وينشرها..كانت التعليمات واضحة،
القصير قدام والطويل ورا،..الأبيض مع بعض..الغوامق مع بعض..الفواتح مع بعض،
البنطلونات تتنشر من فوق مش من الرجلين..القمصان من تحت مش من اللياقة..التيشيرتات جمب بعضها ومتتشدش قوي عشان متبوظش، الغيارات ورا..أو يستحسن جوه البلكونة مش عالحبال، 


التعليمات كانت مهمة..والا..الجيران هيتريقوا على غسيلنا!


في يوم..حصلت مشاغل كتيرة قوي في البيت، والنظام اتنسى خالص،
الغسيل مبقالهوش قواعد كل حاجة اتغيرت


محدش ركز ولا اهتم..بس كان في بنت بتحب الرسم..اكتشفت توليفات جديدة من الألوان عمرها ما كانت هتشوفها طول مالابيض مع بعضه والالوان اللي شبه بعضها مع بعضها
وكان في ولد بيحب التصوير  في العمارة اللي في وشهم .. صوّر لقطات غريبة لأشكال الغسيل من رؤيته هو ودخل بيها مسابقة عالمية وكسب،،
الألوان بهتت على بعضها أغلب الوقت..والعيلة دي بقت مشهورة بألوان لبسهم الجميلة اللي مفيش زيها


مع الوقت..حصل تناغم ذاتي ما بين الهدوم..ومحدش من الجيران اتريق ولا حاجة
ده  حتى كل الناس في الشارع بتاعهم بقت بتنشر الغسيل من غير تعليمات ولا قواعد


والأجمل..إن الهدوم بقت أسعد..في روح حلوة ما  بين الهدوم وبعضها انتشرت..وكل لون شاف نفسه اجمل  جمب لون تاني
والبلكونة والحبال كانوا  الطرف الأسعد في اللي بيحصل..كانوا بيحضروا كل اللحظات الجميلة اللي مبتتكررش واللي بتتكرر..وكمان كانوا موجودين في كل ا لأحدداث بشكل ما




وتوتة توتة
خلصت الحدوتة
حلوة..؟ ولا ملتوتة؟

هناك 7 تعليقات:

رؤى عليوة يقول...

ابتسمت بجد

حلوة الفكرة

التغييييييييير يجعل الحياه ملونة اكثر :)

تسلم ايدك حنان

تقبلى مرورى


دمت بخير

أحمد أحمد صالح يقول...

حلوة طبعا !!
فعلا حلوة و لذيذة كمان واستمتعت بها جدا..
التقيد بقواعد صارمة قد يفقدنا متعة تجربة التمرد و التغيير اللي أما ممكن تحصل لظرف طارئ نكتشف اننا ضيعنا كتير أوي من سعادتنا و متعتنا متقدين رغم اننا اما تغيرنا او اتفكينا ما متناش و لا حاجة !!
..
تحياتي

لبنى أحمد نور يقول...

أنا مبسوطة بيكي وبالحواديت

hanan khorshid يقول...

حلوة أوى يا حنون
احلى حاجة فى الدنيا أصلا كسر النظااااااام بالعافية بقى

richardCatheart يقول...

يالهووووووى على جمالك وبسطتك وعمقك يا بت يا مضروبه ههههههههههههه


كل المفروض مروووووووووووووووووووووووووض

انت جمممممممممممميلة وبحبك وبحب كلامك ودماغك الخربانه دى :)

أسماء علي يقول...

نعمممممممممم
يخرب بيت الجمال و الحكي على أصوله
يالهووووي

طيب أحبك أكتر من كده ايه؟

حنان الشافعي يقول...

رؤى
....
أنتِ الأحلى والأجمل
:)
___________
أحمد صالح
.......
:)
_____________
لبنى
....
^_^
_____________________
حنونتيي
.......
:*
:)
_______________
ماروز
........
:))))))))))))
انا بحبك
______________
سمستي <3
..........
حبيني اكتر كممان ^_^