الخميس، 21 يونيو 2012

البنت اللي بتحب اللاب توب بتاعها

كان ياما كان
يا سعد يا اكرام
ما يحلى الكلام
الا بذكر النبي عليه الصلاة والسلام


كان في بنوتة .. حلوة..زي كل حدوتة، البنوتة دي كانت وحيدة..وحيدة قوي يعني، مع ان عندها صحاب كتيييير ومعارف اكتر، بس نقول ايه..فقرية 


المهم..البنوتة الحلوة دي..كان عندها لاب توب lap top ، كانت بتطل عالدنيا منه..تسمع حكاوي كتير قوي..وتسمع مزيكا..وتشوف افلام وتقرا كتب وحواديت ومقالات ولغات وعلوم في كل المجالات..باختصار..اللاب توب بتاعها كان دنيتها..مكانتش بتبقى وحيدة وهي معاه..عشان كده أغلب الوقت كانت معاه،


واحدة واحدة..نسيت ازاي تتكلم..وازاي تغني..وازاي تضحك..غير للاب توب،
ومن كتر حبها فيه..عملتله كل حاجة بيحبها..حافظت على صحته وحطيتله انتي فايرس..جابتله كل البرامج اللي بيحبها..مليتله الدنيا ورد وفراشات شموع وحاجات حلوة..،
لحد ما جه وقت..ابتدت تحسه مبيردش عليها..وكل حاجة فيه متكررة ومملة..خافت قوي..ونامت طول الليل تعيط..


تاني يوم الصبح اما صحيت..راحت تصبح عليه كالعادة وتصالحه..حتى لو هو اللي غلطان .. اول ما فتحته..لقيت حاجات كتير متغيرة..الديسك  توب صورة بوكيه ورد حلو..وبدال نغمة تشغيل الويندوز الكئيبة..لقيت مزيكا حلوة قوي شبه اللي بيسمعهالها صاحبها إله المزيكا..وبرامج جديدة..وحاجات حلوة في كل ركن من اركان اللاب،
فكرت كتير..لقت انه مستحيل يكون اللاب عمل ده كله لوحده..يكون لبسه عرفيت مثلًا..؟ لا برضه، بس .. يبقى حد هكّر على جهازها وبيعمل كده..واكيد اكيد حد بيحبها وعايزها سعيدة،


عجبتها الفكرة المرة دي..وصدقتها..وكل يوم تسرح شعرها..تلبس حلق مع انها مبتحبهمش..تلبس لبس جميل وتقعد عاللاب..مرات تسمع مزيكا..مرات ترقص.مرات تبص للكاميرا وتبتسم كأنها شايفاه..صدقت لدرجة انها استنته كتير قوي عشان يجيلها
كتبتله رسايل في ملفات word  وحضنت اللاب قوي لدرجة انها سمعت طقطقة مفصلاته لما حست انها محتاجة حضن،
وكتير خلته مش واخد باله وبعتتله بوسة في الهوا..ماهو مبيبوسهاش ابدا!


وفي يوم..كانت بتسمع مزيكا حلوة قوي بعتهالها مخصوص صاحبها إله المزيكا..بس صوتها كان واطي بشكل يضايق، فضلت تعلي في الصوت ميعلاش
اتنرفزت..خبطت اللاب على دماغه..مفيش فايدة..فكرت شوية كده..قالتله لو سمحت علي الصوت..معلاهوش بردك، عيطت...مفيش فايدة..حلفت ما هتضحك ولا هتحضنه ولا هتبوسه تاني..مفيش فايدة،


قعدت 3 ايام مبتفتحش اللاب..ولا اي حاجة اتغيرت..صحيت يوم من النوم..ضحكت..وجريت عاللاب فتحته..بصت للكاميرا وقالتله .. صباح الخير .. انا عارفة ان دي غيرة  .. كنت قول على فكرة..وباسته وقالتله انها بتحبه..وعمرها ما هتبقى وحيدة وهو معاها،

هناك 18 تعليقًا:

أسماء علي يقول...

يخرب بيت الجنان
المشكلة إن ده واقع جدا .. والنص لمسني جداً .. وصعبت عليا نفسنا أوي
:((

يابت انتي بطلي وجع فيا

بس بحبك برضو :*

Hanan Elshafey يقول...

سمستي
اعمل ايه طيب..انا مش هعرف ابطل حاجة او اعمل حاجة..انا بحكي حواديت وبس :)

اسفة لو وجعتك..وفرحانة ان النص لمسك :* :) صباح اللخبطة

كلنا هتلاقينا في البوست ده بالذات..ومن قريب ..تحديدا بعد الثورة :(

بموت فيكي انا :*

Śђąžล ฬąђ٤єĐ ♥ يقول...

موجعه .. بس الوجع اللي بتصاحبه ابتسامه
عسوله اوي اسلوبك :)

Unknown يقول...

امووووووووووووووت انا فى جنونكِ يا حونان :)

Hanan Elshafey يقول...

شذى
متشكرة
نورتيني :)
.........
ديارا
^_^
اتفضليه
نورتيني

إنسان || Human يقول...

جميلة جداً الحكاية ومش شرط تكون لاب توب ممكن تكون أي جماد بنلبسه إنسان وبني آدم وبنعامله على الأساس ده وبننسى مع الوقت

حكايتك رغم جنونها وضحكها العالي اللي بيظهر في ملامحها .. لكن لما بصيت قوي في عينيها وركزت ... إكتشفت إنها حزينة

شمس النهار يقول...

:))
ضحكتني ليه مش عارفة

انا بحس ان اللاب توب ده بقا من العيلة
ماهو الونيس في الوحدة

:))

Unknown يقول...

انا اه بحب اللاب توب بتاعى بس مش للدرجه دى ^_^

مصطفى سيف الدين يقول...

و علشان كده البنات عقولهم في الطراوة :)

بالمناسبة مين سعد و اكرام دول ؟
على ايامنا كان اسمها يا سادة يا كرام

Nour يقول...

على فكرة انا كنت كده فترة كبيرة جدا جدا ولسه لحد دلوقتي بس الموضوع قل عن الاول كتير الحمد لله

عجبني الاسلوب والمعنى نفسه :)

bushhab يقول...

huvhq h;jzhf dh k,k - hk.gd gg]kdh ,a]d td auv hwphf;

salsabel salah يقول...

زي ما أسماء قالت
يخربيت الجنان

Imane Belâbbes يقول...

و دة حال كتير أوي ..
ووقت كبير كنت كدة .. و يمكن لسة فيه ساعات ببقى كدة بس مش زي الاول

حلو الاسلوب و مع ان الحدوتة فيها شيء من الحزن لكن بتخليك تبتسم في الاخر ..

إيمي

hanan khorshid يقول...

يسلم ايدك يا حنون
على فكرة ده شعور حقيقي انا بقيت بحسه اوى برضه عشان ببساطة اللاب توب بقى اجدع من 100 بنى آدم

richardCatheart يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه كان نفسى اكتبلك كلمه هنا بس هاه هعمل ايه

هههههههههههههههههههههههههههههههههههههههههههههههههههههههههههه انتى ماتتخيليش الابتسامة اللى على وشى قد ايه بعد يوم غريب انتى كارثة على رجلين

rona ali يقول...

لسه ممرتش بموضوع بوسه وحضن ههههههههههه
عجبنى المعنى اللى ورا القصه
زمانك بتقولى ايه الناس المجنونه دى انا اللى كاتبه ميستحقش كل دة اساسا هههههههههههههههه انا عارفه :))

أميرة يقول...

هههههههههههههههههه دة جنان رسمي كدة

Hanan Elshafey يقول...

hu-man

:)
الحزن في كل العيون
محدش فينا من يوم ما اتولد وهو فرحان ابا

نورتني..
................
شموسة
ضحكتك بالدنيا
..زي ما قلتي..اللاب ونيس الوحدة
................
وسام
نورتيني
.............
أ مصطفى
البنات عقولهم مش في الطراوة..مع احترامي
نورتني
...............
نور
نورتيني ومبسوطة انها عجبتك
...............
ابوشهاب..
والله منا ردة عليك!
............
سلسبيل..
زيما قلت لاسماء..نورتيني
....................
ايمي

:)
انا مش هعرف اقولك فرحت بتعليقك قد ايه
ربنا مايحرمني منك ابدا
بحبك ياماماتي
................
حنونة
بالظبط يا قمر
بحبك انا :)
.......
مارو.
قول كل اللي في نفسك يا باشا
المدونة عليها اشراف..والفيس بوك موجود
احلى حاجة ضحكتك اللي بتخيلها بترقع في المدونة دي ^_^

...........
رونا
ويارب ما تمري ابدا
ولا مش بقول لاني عارفة انا كاتبة ايه وعارفة ان الناس فهمت وده مفرحني قوي
نورتيني :*
وبحبك