السبت، 23 يونيو 2012

الولد اللي عاش طول عمره يكلم الموج والسما

كان يا ما كان
يا سعد يا اكرام
ما يحلى الكلام ..الا بذكر النبي عليه الصلاة والسلام


كان في ولد عسول

وحليووة

عايش في البحر

كان بيحب البحر قوي

لدرجة انه ميقدرش يعيش من غيره

الولد ده كان عايش على صيد السمك

وقارب

وكوخ صغنون بينام فيه

كان لوحده

بس كان مصاحب كل دول

والسما والموج

كان بيفضل يصطاد طول النهار

ويطلع ياكل

ويكلم الموج والسما

ويرسم عالرمل

وفضلت حياته ماشية كده

تمام

مش حاسس ان في حاجة ناقصاه

لحد ما في يوم

كان قاعد بيكلم الموج

لقى بنت طالعة من وسطيه

افتكرها جنية

صرخ وطلع يجري زي الطفل المفزوع

ولما اكتشف انها بنت مش جنيّة

وقع في غرامها في الحال

دخلها الكوخ

قالتله انه صغير

كره الكوخ

خدها البحر واكلها من السمك بتاعه

قالتله انت كل يوم تاكل سمك بس؟

ابتدا يشتاق للملوخية والفراخ والبامية واللحمة والفول

باختصار

حس ان في حاجات كتيرة ناقصاه

وعشان كان بيحبها قوي

كان نفسه يعملها كل حاجة تتمناها ولنفسه معاها

وف يوم

خد مركبه وراح في قلب البحر

ورمى البنت اللي كان بيحبها مكان ما لاقاها

وهي سابته مندهتش عليه

حس بالذنب شوية

قام قالها اصلي مش هعرف اعمل كل حاجة

ابتسمت وقالتله عادي

بكرة

تفكيرك هيتغير

مشي ومبصش وراه

راح عاش في الكوخ

بياكل سمك كل يوم

وبيكلم الموج والسما

ولسه لوحده

توتة توتة خلصت الحدوتة

هناك 10 تعليقات:

Haytham Alsayes يقول...

دة عيل رخم وسلبي ومعفن
وانتي فصلتيني علي فكرة
:P

أسماء علي يقول...

و تفكيره مش حيتغير إلا بعد مايعدي الزمن .. وتبقى البنت قابلت اللي يفهم أصل الحدوتة .. وإن الحدوتة مش ف اللي ناقص لكن في إنه يكون بجد عايز يحاوطها بإحساس يطمنها .. بس هو ماطلعش عنده حاجة يديها وعايز يسحب منها وبس ..

:))

ويخرب بيت الجمال في الحكي
واتوجعت برضو :)
مفيش فايدة ياصفية

حنان الشافعي يقول...

هيثم
وهو المطلوب اثباته :)
.........
سمستي

الناس اللي فاهمين

لو مفهمش في ستين داهية..يبقى ميستاهلش

ولو فهم..مظنش هيخسر..هيكسب كتير


........
بفرح قوي لما الحدوتة تعجبك ^_^

واسفة تاني عالوجع :((

حبيكي :*

أحمد أحمد صالح يقول...

ربما صاحبنا هذا كان من اولئك الذين ينظرون للطبيعة بأعينهم مفتوحة و ينظرون للحياة بعيون مغلقة و من منظور ضيق جدا قد يخشى ان يخرج عن اطاره..قد يكون هذا يشعره بالامان و الاستقرار و لكن الأكيد انه بذلك يفتقد الكثير و الكثير، يفتقد الحياة نفسها..
اسلوب بسيط و جميل و جمل قصيرة معبرة..تحياتي

حنان الشافعي يقول...

أحمد صالح

نورتني
ومبسوطة بالتحليل وانها عجبتك
:)

شمس النهار يقول...

هو رايق ومستسلم لما هو فيه
هو ياكده ياكده
مافيش وسط خالص
:))

richardCatheart يقول...

حلوووووووووووووووة وهى هيتغير بس متاخر لان الظروف هى اللى هتغيرة مش هو اللى هيسعى لدا هو الخسرااااااااااااااااااااااااااااان

حنان الشافعي يقول...

شموسة
...
قوليلي والنبي :)
..........
مارو
........
بلا نيلة..المهم ان الحدوتة تعجبك ^_^

hanan khorshid يقول...

وليه ميفهمش ده من الاول
ولا هو لازم الرجل يبوظ كل حاجة
والست الى مفروض انها حبيبتى تلعب دور الام وتصبر
على فكرة ولا عمره هيحس ولا يفهم حتى

حنان الشافعي يقول...

حنون
..
غباوة بعيد عنك :)