الخميس، 3 يناير، 2013

عن لما كنت في الحمّام

لما كنت في الحمام من شوية كنت بفكر في حبة حاجات كان شكلها يدي انها حاجات جامدة وينفع تتكتب
كنت منقوعة ..نصي بس منقوع يعني .. في ميّة بتغلي بتغلي
ضهري احمر ومدخن .. ونصي التاني متلج وأبيض من الورقة المايعة
ايدي كانت بتنتج دخان .. كان شيء عبقري
ندى كانت بتقول الدخان فتنة او الدخان بيفتنها
سؤال: ليه الناس بتقدر الجنس وتكاد تكون بتقدسه وشتايمها كل ما زادت قذارة كل ما كانت متعلقة بالجنس؟
سؤال: مين هيبقى عنده فيزا كارد وهيحتاج هولدر بربع جنيه يحطه فيه عشان ميتوسخش؟
سؤال: ليه راسي بتغطس وصدري بيطفو مع ان صدري فيه القلب المثقل بيكم وبكل الوجع وراسي مفهوش غير افكار بتطير اسرع من بخار الميّة؟
سؤال: ليه في حب وكره ومفيش حاجة اسمها "تعادل"؟ مثلا .. أنا مبحبش بابا .. ومبكرهوش .. بالعكس .. بس مبحبوش .. متعادلة! ليه ده ملوش اسم؟
سؤال: أنتو مش بتكدبوا؟ كدابين .. عشان أنا بكره الكدب فعليا .. بس بكدب .. وكتير .. كتير قوي يعني، ليه بتكدبوا وتقولوا انكم مش بتكدبوا؟ وليه بتكدبوا على نفسكم وتقولوا انكم مش بتكدبوا بس بتعملوا حاجات تانية؟
سؤال: لما هو سديم النسر الكبير قوي ده رحم للنجوم  _كتشبيه قريب مش الأقرب_ احنا فاهمين نفسنا كبار على ايه؟ ها؟
سؤال: أنا هزهق من نفسي امتى وابطل اكتب عنها واصبغ الكلام بشوية حزن واحطه في رسالة لأميرة او شوية حب واحطه في رسالة للبنى او شوية بتاع واحطه في اي بتاع؟

ملحوظة متهمش حد غيري، الكلام ده كان هيخرج منه حاجة احسن من كده بس انا كسولة وبضيع وقتي في حاجات تانية أتفه.
ملحوظة تهمكم، لبنى وأي حد قرا رسالة الخروج هيفهم ايه بيجرالي في الحمّام ..ابتسامة.

هناك 4 تعليقات:

richardCatheart يقول...

:)

منجي بـــــــــــــاكير يقول...

راق لي توجّه و مضمون المدوّنة ! الزّمن الجميل يسعدها أن تقاسمك نشر المعرفة و الوعي و السعي إلى الأفضل و تدعوك لزيارتها و التفاعل ، تقديري

شاب فقرى يقول...

الحمد لله إنك بتخرجي أصلا
القلب الابيض او النقي المليان محبة للناس اكيد مش هيغرق أبدا
الراس عشان فيها كل الشرور بتغطس
عشان هي اللى بتدبر وتخطط وتودينا فى ستين داهية ورا الشمس ويمكن بعد الشمس بشوية
:)
الناس بتقدس الجنس فى الفعل مش فى الفكرة
لان معظم الناس بتبص للجنس علي انه حيوانية واشتهاء فارغ لا يوجه به سوي بعض الإحتكاكات وبس

مفهمتش الحتة بتاعة الربع جنيه دي علي فكرة خالص مع انى قريتها اكتر من مرة

نقطة ان مفيش نقطة فى النص
نقدر نقول ان دى زي ما تكون رسالة من ربنا ان مفيش غير ابيض واسود
الاسود غلط واللى فى النص غلط
وان الحب حب والكره كره وغير كدا يبقى تردد وضياع

انا مليش علاقة بسديم النسر دا

مش هتبطلي كتابة غير لما حد من القراء يقوم بعملية انتحارية ويملي البانيو بنزين مع الشمع :D

مش لوحدك اللى كسولة

دمتي بكل خير

وسوري لطول التعليق و حاجات تانية فى التعليق

شاب فقري

شمس النهار يقول...

المفروض اضحك بس مش عارفه ليه تنحت وقريت التدوينه مرتين :)


كل سنه وانتي طيبه ياحنونه وبخير وصحة وسعادة