السبت، 4 يوليو 2009

ياجدعااااان،ده تاج لحنان


بيان هام!!!
إنه في يوم مش فاكره كام/6تقريبا/2009السنه اللي احنا فيها يعني ،
حدث أن : قام المدعو (الأخ والصديق الكريم : أعشق في الليل ضوء القمر ) ،
بتدبيسي في تاج كان نفسي جدا أدبس فيه ؛) ،وعلي هذا فعلي جميع المدعين بالحقوق التدوينيه والمتلبسين بإمتلاك مدونات تمر من هنا قراءة هذا التاج وجميع إجاباته والتعليق الزامي ، وعلي الجميع وأيضا من ستذكر أسماؤهم تاليا الإجابه أيضاً ..
انتهي البيان.
تنويه هامبين قوسين اعتذار!!!
إنه أيضاً في فترة غيابي القهريه المغلوبه فيها علي أمري ، حدث وأن أهداني عادل (البلددي فيها حكومه) وبسمه (أيام زمان) والمعلم محمد-صاحب المطعم(طعمية سخنه)وسوول الحبيبه والصديقه العزيزه(soul whisper)،تاجات الزاميه ،غير أني لم أقدر علي اجابتهم جميعاً ولهذا يأتي الاعتذار..
انتهي التنويه.
الإعتذار!!!
أعتذر منكم جميعاً إلا عادل لأنه مش بيحب الإعتذار والعمر مش ببلاش ، عن عدم حل التاج ويارب يكون هو نفس التاج اللي اتبعتلي انهارده عشان احله ،
انتهي الإعتذار .
اعتذار تاني !!!
وعلالله حد يضحك ،
معلش ياخواننا محطتش لينكات مدوناتكم لأني وبكل صراحه معرفش :( ،اللي بيضحك هناك ده لو مسكتش هو حر ،
انتهي .
شكر بقي !!!
أشكركم جميعاً علي اهتمامكم بالسؤال عني حال غيابي وتواصل كثير منكم معي علي الهاتف من عميق قلبي أشكركم ، وصدقأً (فرقت معايا كتير وهونت عليا أكتر)
اليوست اللي كتبت فيه إني خلاص رجعت ، بجد تعليقاته خلتني بكيت ، أصل عيني اتطرفت ساعتها :))، بشكركم عالتاج كلكم وخصوصا اعشق ، وفيما يلي قائمة بأسماء المطلوبين للعداله:
1:سوول اللي سألت عني بالتليفون وعالمدونه وبجد فرحت جدا اني سمعت صوتك ونفسي جدا اشوفك ،
2:عادل البلد دي فيها حكومه ، بصراحه جدع وطيب وسأل عني كتير،
3:ايناس عاشقة الاحزان بجد ودوده وطيبه وعسوووووله جدا وحبيتها من قبل ما اعرفها ،وبقالها غايبه مده عايزه اروح اسال عنها،
4:احمد أسماء احلام في وجداني ، انسان موهوب واخ كريم فعلا سأل عني كتير،
5:المعلم محمد صاحب المطعم طعميه سخنه ، برده سال عني كتير ، ووعد اول بوست فرايحي انزله هيكون عشان خاطره من غير زعل بقي بس هو طلب ويارب اان اعرف اكتب حاجه فرايحي،
6:أحمد أسير الجراح ، اتشرفت اني قابلته هنا في اسكندريه ، كان غايب زيه زيي واول ما رجع سال عني ،
7:المفاجأه بقي قارئ رائع ومتابع جيد،محمد،بيعلق عندكم وعندي باسم hasona ، مع ان معندوش مدونه الا انه متابع وديما تعليقاته مميزه ، نفسي فعلا اقراله لو عمل مدونه واعرف اتابع انا كمان ولا هو احنا بس اللي متراقبين :)) ،
8:بدراوي، انسان محترم جدا ، معرفتنا التدوينيه قريبه جدا ، لكنه سأل عني عكس ناس اعرفها من زمان وبعتبرها صديقه ،
9:الورده البيضا rosa اللي غايبه بقالها مده هي كمان ،
10:معتزشاهين_باحث تربوي، مدونه محترمه ورائعه لانسان فعلا محترم ، سال عني برده:) ،
11:نور الدين محمود صاحب مدونة نور الدين وحاليا يكتب والرائعه ليساندرا ، كاتب وأديب ومفكر أكثر من رائع ،حروفه في قوة سيفه ،سأل عني كتير وتواصل معايا كتير فعلا كان احد أسباب صمودي برغم انه ميعرفش ؛) ،
12: أخيرا وليس اخرا أعشق في الليل ضوء القمر ، انسان مميز ، كفايه عشقه للقمر ، مدونته مميزه جدا جدا ، سأل عني كتير جدا ، اعتبره صديق لا يقل عن أصدقاء عمري ،
13 : اخر وواحده سالت عني ، صديقه بجد غاليه عندي جدا جدا ، هي مش مدونه لكنها بتقرالي ديما وكتير الاقيها معلقه ، بتفرق معايا بجد وبحبها جداجدا ، برغم انها مش بتحب الادب اوي الا انها حبته عشان تقرالي وبتقول رايها ولا نقاد الادب المتمكنين ، اعتقد ان مفيش حد منكم يعرفها ، بتعلق بغير معرف ومره واحده علقت بشيماء ، شيماء عبد المنعم ، صديقتي وأحب صديقه لقلبي ،
كتبت تقريبا كل اللي سالو عني وبشكرهم جدا وبعذر اللي مسألوش ، زعلانه جدا من ناس معينه طنشتني ومسالتش حتي بتليفون لكني برده هعذرهم (بكره الزعل والخصام) ،اول حد زي اخر حد كلكم فرقتوا معايا جامد وتعليقاتكم بجد فرحتني،
انتهي الشكر .
التاج بقي !!!
1:من أنت ؟؟
-اسمي حنان الشافعي ، سني 21سنه وكام شهر ، بدرس لغه عربيه في جامعة الازهر، بحب الرسم والتمثيل وحاجات كتير سبتها مفضلش بقي غير الكتابه وربنا يستر.
2:ماالذي تفعله هنا ؟؟
-ليه في اعتراض ولا ايه علي وجودي ، عموما انا هنا بكتب كل كلمه بكتبها بتكون احساس مهما كانت فكره او رؤيه بس هي في الاخر احساس صادق وبس .
3:اسرائيل تقصف كل جنوب ممكن بحثاً عنك أي شمال تقصد ؟؟
-أهرب يعني !! واخواتي اللي بيموتوا دول ، بتدور عليا ده انا اللي نفسي اروحلها ، مش انا بنت ولا حول لي ولا قوة بس لو عرفت اوصلهم ياويلهم مني .
4:انت مكلف بحذف حرف من حروف اللغه العربيه أيها ستختار ولماذا ؟؟
-لاااااااااااايمكن الا اللغه العربيه مينفعش ، ازاي احذف حرف من لغتي والضمه والفتحه بتفرق .
5:لو قدر لك أن تدخل السجن فما القضيه التي تتمني أن تدخل بها إليه؟؟
-قتل مع سبق الاصرار والترصد ،
اقتل كل قدوه سيئه كل عنف كل كدمه بتشوه بلدي كل كلمه سودا مقصود بيها حقد وفتنه كل انسان أسوأ من كل سوء ، اترصد لكل عدو خفي واقتل كل عداء ..
6:منذ متي اكتشفت نفسك ؟؟
-ده علي اساس اني مطربه ولا ممثله ولا ايه ، بيتهيألي اني ببتدي اكتشف نفسي من ساعة ما كملت 21، يعني من كام شهر ههههههههههه.
7:علي مفترق طريق لافتتان اليمني تقول (الي حلمك) والثانيه تقول (الي مالم يحلم به البشر) أي الطرق ستسلك؟؟
-هخليني من أهل اليمين وأروح لحلمي ، فحلمي لم يحلم به بشر (غيري يعني) .
8:نحن لا نعيش حياتنا بل نتعلم فيها كيف نعيش .. ما تعليقك ؟؟
-حياتنا عايشينها عشان ما بعدها ، أعمالنا فيها هي اللي هتحدد مصيرنا ، ضروري جدا نتعلم نعيشها صح ،يعني مرحله انتقاليه مهمه جدا ، ولو كنا مش عايشينها امال احنا فين بقي ؛) .
9:بجمله واحده فقط اكتب تعريفالكل كلمه من الكلمات الاتيه :
الوطن: مكان بقلبي تحلق فيه روحي مطمئنه.
الأم: محور هام في حياتي ، ابنتي أحيانا .
الليل: سكون مهم جدا ، كتبت فيه أجمل كلماتي .
الحب: قوه هائله تحرق صاحبها ، هكذا اخبرني صديق ،أما انا فلا اعرف، امنت بوجوده لكنني لم أصل لماهيته ، نستمده من حب الله ثم نشوهه بأيدينا ( منذ عرفت بوجوده عاهدت نفسي الا اكتب ابدا عنه ) .
أمريكا: مؤلف ومخرج ومصور كل المسلسلات الزائفه علي الساحة العالميه ، كره وحقد ، كاس دم بيتجمع من كل مسلم .
المرأه: مدرسة بدونها كلنا أميون .
الصمت: ملاذ ولغه وابداع .
الانترنت: وسيلة تواصل ذات حدين واحتمال اكتر من حد .
10:قيس ، عنتره ، وجميل هم الذين يقولون شعرا ، وليلي ، وعبله ، وعزه صموت لماذا هذا التغيب للمرأه ؟؟
-اولا اللي حب عزه كثير مش جميل واللي حبها جميل بثينه مش عزه ، ثانيا صموت دي مش مريحاني لغويا ، اما بقي ساكتين ليه ، اصل لما الكرأه بتتكلم الرجل بيقول عليها رغايه ...
11: أن تكون مطلوبا في جريمه خير لك من الا تكون مطلوبا مطلقا . هل تتفق مع هذه العباره؟؟ علل؟؟
-لاطبعا ، أبقي منبوذه كمان مش غير مطلوبه انما مبقاش ظالمه ولا خارجه عن ديني وقانوني ، دي اسمها همجيه.
12:الي اين تمضي كلمات الحب بعد ان نقولها ؟؟
-اعتقد انها تخزن في عقول المحبين واذانهم ، لا اعتقد انها تذهب ادراج الرياح ابدا ، ولا ادراج المكاتب حتي .
13: هل تجد علاقه بين المرأه وقطاع الطرق ؟؟
-لا .
14: هذا فراق بيني وبينك متي ولمن تقولها ؟؟؟
-بصدق لااقولها ، لكني افعلها وبلا رجعه مع من يجرحني ..
15: كيف هو غدا ؟؟
- غدي احبه لان به ما انتظره..
16: لمن تمرر التاج ؟؟
-كل اللي في الريدر ,
كل حد دخل مدونتي علق او معلقش في الريدر او لا ,
والاتي اسماؤهم:
نور الدين
عادل
البت المشمشيه
كيارا
سويت فيوليت
بسمه
مدينه من النساء
ليساندرا
رومانسي
ادم مملكة الزمن الجميل
وطبعا
شيماااااااااااء زااااااااااايد همسات القلم .
انتهي ..
.
.
.

هناك 74 تعليقًا:

adel يقول...

التحليق الاول

فوووووووووووووووووووووووو

adel يقول...

كمان تسيح لعادل
ماشي ماشي

و ابقي فاكرني اعلمك ازاي تحطي لينكات

Hanan Elshafey يقول...

يا مراحب يا مراحب
حلق براحتك يا عدول

Hanan Elshafey يقول...

ADEL
شفت بقي
والله عيب بقالي قد ايه بدون ولسه مش اعرف احط لينكات

adel يقول...

ياعم ياعم علي التاج ده
اجابات حلوة قوي

بس فيه علاقة بين الست و قطاع الطرق
هاقولهالك بعدين
ههههههههههههههههههه

وبعدين خلاص فرقت جميل جب مين بثينة ولا عزة
التلاتة ماتوا خلاص

زعلتيني عشان الرسم و التمثيل :

adel يقول...

كمان بتديني التاج

انا اعمل زيك و انفض بقي

ههههههههههههه

Hanan Elshafey يقول...

ADEL

طبعا هو تاج هيخوفني ولا ايه

وبعدين علاالله تقول الاتنين حراميه احسن بعدين انت حرررررررر

واه تفرق جميل بثينه وكثير عزه واللي يغلط مش مسامحااااااه
ده تاريخ
حضاره يا دارس الحضاره

واان كمان زعلانه عليهم بس بحاول يعني ارجع لهم

Hanan Elshafey يقول...

ADEL
لأاااااااا مليش دعوه
انا كنت غايبه عن التدوين خالص اصلا
انما انت موجود
يبقي هتجاوب يعني هتجاوب

Unknown يقول...

معلش قبل ما اقول تعليقى
احب اشكرك على وضع اسمى ضمن الناس
اللى سألت عنك
عادى نو بروبلم

تانى حاجة هو انا مدبس فى التاج ده
و لا ايه الموضوع
!!!!

Unknown يقول...

ادينى قريت اههه
تاج جميل
بس انا كنت فاكرك اكبر من كدة
يمكن عشان مواضيعك بتقول كدة

صحيح انا كدة مدبس من اخت سووول
و منك كمان

طب انا مش مجاوب بقى
ههههههههههههه
نفضت للتاج ده
مش بحبه
ايه اللى انت فى شمال اسرائيل تروح لليمين
ههههههه

( آلاء)daughter of egypt يقول...

حنون اول مرة ادخلك
ردودك فيها خفة دم
عجبتيني اوي لما صلحت الغلطة الفادحة بتاعت جميل وبثينة
يالهوي كده الرجالة تزعل من بعض بعدين ده من اوله ثانوي الادب الجاهلي ده
يع فكرتيني بالادب


تقبلي مروري سلاموز

adel يقول...

حاضر ستي هجاوب التاج عشان خاطرك

اعشق فى الليل ضوء القمر يقول...

واو
إسمى أتذكر فى مدونه رياح الحنين

حنان نطقت بإسمى
إستنو إستنو إيده قلبى هيقف من الفرحه
انا مش مصدق نفسى أكون صديق لجنان و كمان مدونتى فيها تمييز لا هتخلينى أتغر فى نفسى
صحيح إنت سيبتى مين ما قلتيش إسمه
ولول على التاج كنت قلتى و انا كنت أبعتهولك من قبل ما يجيلى
انا جالى قبل كده بس رفضته لو كنت اعرف كنت بعته على طول
معلش معرفش تليفونك كنت ممكن ابعتلك بليس كول مى أو ميسد كول أطمن عليكى بيها ههههههههه

نيجى بقى للإجابات

لا بجد إجاباتك رائعه برافو انا فهمت براعتك دلوقتى فى كتاباتك منين بتدرسى عربى من ورانا

فيه عندى فى المدونات اللى بتابعها فى الأخركده مدونه بتعلم الأكواد و تظبيط المدونه هتفيدك ادخلى عليها

فيه جانب من شخصيه جميله ظهرت فيكى فى البوست
خفيفه الدم وروح ساميه بنفس صافيه
ماشاء الله عليكى
بدل ما يتقال إنى بحسد ولا حاجه
هههههههه

صحيح بعتز بمدونتك و بمعرفت كاتبه مثلك

على فكره مدونتك حلوه وإجابتك جميله

بس إجاباتى أحلى من إجاباتك (وش مطلع لسانه و بيغمز)

Hanan Elshafey يقول...

بدراوي


انت تعمل اللي يعجبك
مدونتك يافندم

وايوه حضرتك مدبس في التاج وهزعل لو مش جاوبته

Hanan Elshafey يقول...

بدراوي

اشكرك علي رأيك
وفعلا مدبس مدبس
ولااااااااازم تجاوب

Hanan Elshafey يقول...

الاءdaughter of egypt
مبسوطه ان ردودي عجبتك ومبسوطه اكتر بزيارتك
وطبعا كان لازم اصلح امال مين يحمي الادب لو تخليت عن مسؤليتي

ومش يع عالادب بقي

Hanan Elshafey يقول...

adel

اشكرك طبعا

Hanan Elshafey يقول...

اعشق في الليل ضوء القمر

هههه قلبك هيقف ليه يعني مش انت اللي هديتني التاج لازم اقول اسمك طبعا ؛)
فعلا مدونتك مميزه وفعلا بعتبرك صديق
الا اذا كان ليك راي تاني بقي
وقلت اسامي كل الناس بقي بحب ادي كل حد حقه

طبعا متشكره انا قصدي اني كنت هاخده حعلى فكره مدونتك حلوه وإجابتك جميله

بس إجاباتى أحلى من إجاباتك (وش مطلع لسانه و بيغمز)
تي لو مش عزمتني عليه :)

لا بجد إجاباتك رائعه برافو انا فهمت براعتك دلوقتى فى كتاباتك منين بتدرسى عربى من ورانا
شفت بقي العربي هو السبب

فيه عندى فى المدونات اللى بتابعها فى الأخركده مدونه بتعلم الأكواد و تظبيط المدونه هتفيدك ادخلى عليها
اشكرك
اشكرك كمان علي رايك في اجاباتي وانا كمان بعتز بمعرفتك والله

على فكره مدونتك حلوه وإجابتك جميله

بس إجاباتى أحلى من إجاباتك (وش مطلع لسانه و بيغمز)
طبعا طبعا وانا اقدر اقول غير كده ( نفس الوش اللي بيغمز برده)

مدينـة من النسـاء يقول...

أولاً ,, اجاباتك جميله فعلا
تاني حاجه كان فعلاً نفسي اطمن عليكي بس معرفش طبعا اوصل لك ازاى وياريت بجد تبعتى لى ايميلك على راسلنى عندى في المدونه
وعلى فكره دى اول مره حد يبعت لى تاج
ومبسوطه اوى انه منك

كوني بخير دايما ..

صوت من مصر يقول...

عارفه الوحيده الى جاوبت على سؤال فى التاج بقول هو امتى حد هيجاوبه
هو سؤال اسرائيل
فلما لا اكون مجاهد فى حب وطنى

جحا المصرى يقول...

حلوه الإجابات
ربنا يكرمك ويسعدك دايما

Unknown يقول...

هيلوووووووووووو
معلش بقي يا حنان انا في اجازة بس مقدرش مقراش بوست انتي كاتباه

بس لازم السياح و فرايحي ! :D

اجاباتك حلوة اوي يا حنان

بس اقولك علي سر ؟ شكل المدونة مديكي سن اكبر بكتييييييير من سنك

مش هقولك كام :P:P:P

Sweet Violet يقول...

اجابتك جميلة ياتوتا

بس هو انتى ليه مش اهديتى التاج لحد هه
اخر حاجة كان السؤال 15 و بعدين كتبتى انتهى ^_^

امال ايه بقى ليك تاج و الكلام ده
وقعتى قلبى ياشيخة هههههههههههههههههههههه

طب الحمدلله بقى انك نسيتى تهدى التاج
P:

Unknown يقول...

إجابات مقنعة وهادئة ورصينة
وفقك الله للخير داءما
واعتذر عن عدم قبول دعوتك .. لأني سبقتك وجوبت على التاج ده على مدونتي

ويبقى التواصل

أحمد الصعيدي يقول...

السلام عليكم
بم ان التعليق إلزامي
والاخ أعشق في الليل قمام بتدبيسي بنفس التاج ..

ردود واقعية بالعامية تنم علي الخير عموما

أتمني التواصل
أخيك أحمد الصعيدي

romansy يقول...

يا هلا يا هلا
ايه التاجات اللى زى العسل دى
ان شاء الله نحقق كل اللى نتمناه
وشكرا على اهدائك التاج ليه وانك افتكرتنينى

عايش... ولكن !!!! يقول...

حلوه الاجابات بتبين عن شخصيه جميله
دمتى بكل سعاده

اسماء واحلام فى وجدانى يقول...

اختى الفاضلة

دوما تاتينى بالافادة اشكرك جدا ،،،،، فى الاول عايز اقولك ان شكرك ليا زعلنى اوى لانى باعتبرك اختى بجد ومش مستنى شكر على السؤال لان ده حقك عليا والحق مش له مقابل ولا شىء فى الدنيا ممكن يقدره
لان الحق هو الله
ثانيا انا طبعا اشكر على توضيح وتصحيح الكلمة وجارى تعديلها

نور الدين (محمد الجيزاوى) يقول...

اهلا حنان
..................
اولا اشكرك على تعريجك على اسمى ولو انى مش فاهم حكاية الصمود اللى بتقولى انى معرفهاش ولازم بقى اعرفها دى بقى تاج تانتى ليكى مكون من سؤال واحد وهو انك تفهمينى

اما عن التاج اللى ارسلتيه فانا دائما ما كنت اعتذر عن قبول التاجات ولم اقبل اى تاج الا مرة واحدة كان من الرائعة ليساندرا واسميته تاج الملك المخلوع
ويبدو انى هقبل التاج بتاعك وان كان دة مش وعد عشان متقوليش انى وعدت
لكن اوعدك انى ان شاء الله هاحاول جاهدا
..
اجاباتك كلها رائعة
بس انت متأكدة ان المرأة مفيش علاقة بينها وبين قطاع الطريق دة مجرد سؤال طبعا وبالمناسبة انت نسيتى وحطيتى فى المرأة كاف بدل الميم
..
لكن اللى عجبنى فعلا فعلا حكاية الحلم البيمين والحلم اليسار الذى لم يحلمه بشر اجابتك كانت اكثر من مذهلة رغم بساطتها
باختصار انت ممتازة
تحياتى لك .
.................
نورالدين محمود

mahasen saber يقول...

طب انا لا معايا رقم تليفونك

ولاا اعرف انك كنتى غايبه اصلا لانى شبه مش موجوده هنا اصلا

بس حمدالله على السيلامه يا جميله

ونورتى من تانى

واول مره اعرف انك بتدرسى فى جامعة الازهر انا بشتغل فيها تخيلى
ربنا يوفقك

♥نبع الغرام♥♪≈ يقول...

السلام عليكم

وحشتنى قووى ياحنان

وربنا ما يحرمنيش منك يارب
والحمد لله انا كويسه وبخير

وطبعآ جميل قووى التاج بتاعك
انا جاوبت التاج ده قبل كده يلا بقا معلهش

ربنا يسعدك يارب
دمتى فى حفظ الرحمن

بحبك قوووى

انوسه

وردشان smilyrose يقول...

السلام عليكم

وحشتينى يا حنان

اجابات جميلة

وطبعا فيها حاجات عرفتها منك

قبل ما تنشريها

ههههههههههههه

وحشنى حديتنا جدا

ومش بترنى ليه يا ااااااااااااا

مش بخيله هههههههههههههه

وردشان

روح الحب الصادق

adel يقول...

فينك يابنتي بقالك كام يوم ؟؟؟

نرجو الافادة

هههههههههه

arsenalwy يقول...

اجاباتك جميلة فيها حس الدعابة

ربنا يوفقك فى حياتك

اول زيارة ليا عندك

اتمنى ان تشاركينا فى حملتنا ومن احياها كل التفاصيل هتلاقيها عندى

وجزاكى الله من خيره

Somaya Kamal El Din يقول...

ايه ده هو الاسئلة واحدة ولا ايه

ايه موضوع التاج ده يا جماعة مش فاهمة حاجة

Kiara يقول...

واناا ايه بفتح الريدر لقيت حنان نزلت بوست قلت اشطه اروح اقراه

الاقي اعتذارات وحاجات ومحتاجات واقول البت دي عثل والله

اقرا الاجابات احس بيها اكتر واكتر


اووووووووووووووووووووووم ايه

لما جت عند الحته اللي تحت لاقيت اييييييييييه

قولوا انت

لاقتها

حطه اسمي في اللي مديياهم التاج


اووووووووووووم

اييييييييه


غيرت رايي من اني اقولها انها عثثوووووووووووله



واصدر فرمااااااااااااااااااان رسمي


باعدامها


ان ان اااااااااااااااااااااااان

وحشاني وربنا

اعشق فى الليل ضوء القمر يقول...

فعلا مدونتك مميزه وفعلا بعتبرك صديق
الا اذا كان ليك راي تاني بقي

طبعا مليش رأى تانى
ذلك يكفينى و كفى

آفشنا حرامي يقول...

نحن فى انتظار زيارتك

لامر هام

يختص بينا كأسرة واحدة

Hossam يقول...

سلام عليكم
بجد تاج جامد اخر حاجة
بجد انا مقصر جدا فى حقك بقالنا كتير جدا مش بنشوف بعض كتير جدا جدا جدا
بجد عجبتنى اجاباتك فى اسئلة اجابتك فيها راعة
تحياتى صديقتى
سلام

أبو العريف يقول...

السلام عليكم
انا قريت التاج ده عند ناس كتير
وكل مره اقراه
اتأكد اني مش هعرف اجاوبه
لان كل حد بيجاوبه

بيأكدلي اني مش هعرف اجاوبه زيه

اجاباتك جميله فعلا

انا قريت بس التاج
واكيد

هرجع تاني عشان اقرأ كتاباتك

تحياتي

Hanan Elshafey يقول...

مدينه من النساء

مبسوطه ان الاجابات عجبتك وان شاء الله ابعتلك ايميلي قريب جدا
هستني اجاباتك قريب

*البت المشمشية *حلوة بس شقية * يقول...

بصراحة يا حنان
مقدرتش اقراه
انا عينى وجعتنى من الكلام لازق فى بعضو
والالوان
سامحينى

Hanan Elshafey يقول...

صوت من مصر

تقصد لم لا يكون هذا الاساس

اسعدني مرورك

Hanan Elshafey يقول...

جحا المصري

اشكرك ومرور كريم

Hanan Elshafey يقول...

المعلم محمد صاحب المطعم-طعميه سخنه
هيلووووو ورحمة الله وبركاته
طبعا لازم نسيحو بقي ونفتنو عليك

شكل المدنه مديكي سن اكبر من سنك
جمييييييييييييييل
احسن حاجه ياريت يبقي 40 ولا 50
متشكره انك متابع حتي وانت في اجازه

Hanan Elshafey يقول...

sweet violet
تووووووووووووووتا
معلش معزوره متعرفيش
مااااااااا علينا
لا يماما التاج اهديته وسيادتك واخداه
وهيتحلللللللللل يعني هيتحللللللل
اول مره اهديكي حاجه بقي

Hanan Elshafey يقول...

معتز شاهين-باحث تربوي
اشكرك علي رايك ومفيش مشكله طالما حليته

ويبقي التواصل

Hanan Elshafey يقول...

شجر الليمون
اشكرك عالتعليق وعلي رايك

وان شاء الله يكون التواصل

Hanan Elshafey يقول...

romansy

اشكرك علي رايك
ويارب تقبل التاج بقي

Hanan Elshafey يقول...

عايش ...ولكن!!!

اشكرك

Hanan Elshafey يقول...

اسماء واحلام في وجداني

اشكرك اخي الفاضل وبتشكرني علي ايه انا اللي اشكرك انك قبلت ملاحظتي

دمت بخير
والتاج ليك كمان علي فكره

Hanan Elshafey يقول...

نور الدين

اهلا بيك يانور
..............
ولا اشكرك على تعريجك على اسمى ولو انى مش فاهم حكاية الصمود اللى بتقولى انى معرفهاش ولازم بقى اعرفها
اكيد هقولك
ان شاء الله


لكن اوعدك انى ان شاء الله هاحاول جاهد
وده شئ يسعدني جدا جدا جدا
اهديتهولك اول واحد علي فكره


وبالمناسبة انت نسيتى وحطيتى فى المرأة كاف بدل الميم
..
اشكرك علي تنبيهي


لكن اللى عجبنى فعلا فعلا حكاية الحلم البيمين والحلم اليسار الذى لم يحلمه بشر
حلمي غير كل البشر ولم يحلمه بشر


اجابتك كانت اكثر من مذهلة رغم بساطتها
اخجلتم تواضعنا عموما اشكرك علي رايك

وتحياتي لك

Hanan Elshafey يقول...

mahasen saber
طب انا لا معايا رقم تليفونك

ولاا اعرف انك كنتى غايبه اصلا لانى شبه مش موجوده هنا اصلا
يتبعتلك يا قمر انتي التليفون
وعذراكي جدا
واول مره اعرف انك بتدرسى فى جامعة الازهر انا بشتغل فيها تخيلى
ايه ده بجد
طب جمييييييييل
هنتواصل اكيد

Hanan Elshafey يقول...

عاشقة الاحزان
وعليكم السلام ورحمة الله وبركاته

انتي كمان وحشتيني جدا جدا جدا
حمدلله عالسلامه يا انوس
مش مشكله يا حبيبتي طالما جاوبتي خلاص

انا كمان بحبك اوي اوي
خلي بالك من نفسك اوي

Hanan Elshafey يقول...

smilyrose
وعليكم السلام ورحمة الله وبركاته

وانتي كمان وحشتيني جدا جدا
طبعا وفي حاجات كمان تعرفيها مش كتبتها
هههههههههههه
طب انا مش برن انتي مش بترني ليييييييييه

Hanan Elshafey يقول...

adel
في الدنيا

Hanan Elshafey يقول...

arsenawly
اشكرك علي رايك ومرورك الكريم
وبالنسبه للمشاركه
هروح اشوف الموضوع

Hanan Elshafey يقول...

somaya kamaleldeen
مش فاهمه انا افهمك ايه

Hanan Elshafey يقول...

كيارا
اووووووووووووووم ايه هتحلي التاج برده
وانتي كمان وحشاني والله

Hanan Elshafey يقول...

اعشق في الليل ضوء القمر

اشكرك اذا

Hanan Elshafey يقول...

افشنا حرامي
ربنا يستر

Hanan Elshafey يقول...

hossam
وعليكم السلام
قصدك مش بنزور بعض
عالمدونه
اشكرك علي رايك

سلام

Hanan Elshafey يقول...

ابو العريف
سعيده برايك وزيارتك وكده بقي انت هتاخد التاج وتجاوبه اكيد

هستني زيارتك

Hanan Elshafey يقول...

البت المشمشيه

سبحان الله
مع ان ناس كتييييييييييير قريته وعرفت
سلامة عينيكي يا قمر
اغيرلك كل الالوان
بس كده

أسير الجراح يقول...

ياااااااة انا متاخر اوى


لكن غظب عنى والله


المودة لازم تكون بينا

ولا انتى شايفة اية


على فكرة اجباتك رائعة جدا



وللاسف التاج مش حقدر اخدة دلوقتى خالص


لانى مشغول شوية

وان شاء الله اقدر اجاوب علية فى اقرب وقت


مودتى


اسير الجراح

اعشق فى الليل ضوء القمر يقول...

كنت مستنى منك كلمه
فى البوست بتاعى من كام يوم بس يا خساره شكلك مكنتيش فاضيه
المهم تكونى بخير

Hanan Elshafey يقول...

اسير الجراح
مش متاخر ولا حاجه
المهم انك جيت
ولا ايه
اشكرك علي رايك في الاجابات
ولو عالتاج هستني لما تحله ان شاء الله ويكون قريب

Hanan Elshafey يقول...

اعشق في الليل ضوء القمر

والله عارفه اني مقصره بس كنت تعبانه ومش بفتح النت نهائي
علقت علي فكره

elsha3er يقول...

السلام عليكم

اية كل الاعتذارات دى كلها كل دة

اجاباتك جميلة ربنا يوفقك

تحياتى

احمد الشاعر

Hanan Elshafey يقول...

الشاعر

اشكر مرورك ورايك

تحياتي

طوبه فضه وطوبه دهب يقول...

جميله اوى اجاباتك والاجمل صدق احساادام الله عليكى كل هذا الصدق وتسلم ايدك وتحقق كل ما تتمنيه يارب

♥نبع الغرام♥♪≈ يقول...

انا جايا اطمن عليكى اختى الحبيبه

تحياتى لكى بحياة سعيده
انوسه

ادم المصرى يقول...

تاج جميل اوى يا حنان ومرسى على اهدائك التاج ليا

آه وكفى يقول...

حنااااااااان ازيك
انا عارفة والله اني مقصرة بس انا كمان مش عندي ماسنجر ياهو فمش عارفة اكلمك وكل ماا تصل على الموبيل تطلعلي الست دي اللي شبه شحتة المزين تقولي الهاتف المطلوب مشنوقا او محروقا

اتصرفي عشان وحشتيني وحلو اوي قايمة الاعتذارات والتشكرات اللي في الاول دي بجد فطستيني من الضحك وبصراحة انا ضحكت لما قولتي محدش يضحك وعماله بضحك والله وانا بكتب التعليق اهو

نياهاهاهاهاااااااااااا بالغيظة فيكي