السبت، 16 فبراير 2013

إلى لبنى






  • طب ما أنا عندي دراعات طويلة يا لبنى
دراعات طويلة وجسم كبير طويل بيخليني أعرف أحضن أي حد ومهما كان قريب أو بعيد بيطمن ..
لست أدري لم اعتقدت أنني يجب أن أجيب عنكِ هكذا .. وكأنني أنفي قول من قال "الحاضن والمحضون يطمئنان" أو ما يقارب ذلك . أعتقد أنه كان صاحب ظل الأفعى والروايات تلك، يوسف زيدان باين؟؟!!
مابعرف .. المهم إنو ما بنستقيم .. مابتطمن قلوبنا ولا شي
زمان لما كنت في اسكندرية كنت أحسن , بحب أقول لنفسي كده .. احنا حلوين .. كنا حلوين واحنا في اسكندرية ياحنان .. بس الحقيقة إني استأصلت حتى اللكنة ..


  • مكانش عندي مشكلة أحس إنك بتعتبريني بنتك..أو بتحسيني بنتك .. أو أنا عندي مشكلة في الحقيقة لأن عندي أم بحبها ولأني شايفة نفسي أم الكون والبشر .. مينفعش أحس إني بنت حد .. بس أنا مكنتش بقولها كده لما كانت بتقولي إنها بتحس إني بنتها .. آه هي السبب في الحقيقة لرفضي لإحساسك .. زي ما مش بحب حد يقولي يا "حونان" برضه..

  • آكشلي .. أنا كنت بسكت وأسيبها تحس وتتعامل على إنها أمي عشان تبقى كويسة .. كنت باخد بالي منها بالطريقة دي .. أنا مش محتاجة أم ولا عمري احتاجت ولا ههحتاج أم يا لبنى
  •  بس أنا احتاجتها ومحتاجاكي دلوقتي .. "كُن صديقي" اللي قالتها ماجدة الرومي جملة مبهرة .. الأصدقاء نادرون ندرة فصيلة دمي في مصر
  • مش عايزة تكوني أم .. سماح قالت هتبقي أم حلوة .. أنتي عارفة إنك هتبقي أم حلوة .. أنتِ تخافين أن تصبحي أمًا حقيقية .. لو أدركتِ ما أدركه لما خفتي .. كل ما ينقصكِ هو اللقب يا عزيزة .. أنتِ بالفعا أم لثلاث أشخاص بالغين حاليًا .. !
  • عمومًا .. لا تقلقي .. الأمهات في بلادي يولدن أمهات .. ويحصلن على الخبرة الكافية برميهن في القدر مباشرة دون تجهيز
  • الدراعين مش خرافيتين ولا حاجة يا لبنى .. قولي لنفسك إنو الناس من كتر ما انخذلوا بقوا بيمارسوا الخذلان كعادة احترازية تشبه تطعيمات الأنفلونزا في أول الشتا .. ولو صدقتي ابقي قوليلي!
  • أحمد مش ابنك أحمد باباكي اللي خدتي بالك منه .. هو مشي بس حبك كويس الأول .. اتمسكي بده عشان انتي متعرفيش لو كان حرمك من ده قبل ما يمشي كنتي هتحسي ازاي
  • الصوت مؤمن .. الصوت وحده المؤمن!! مش بتغيري من ده؟
  • آمني أنتي كمان وابقي ماما من غير ما تخافي وأنا ماما ومش بخاف وعندي دراعات ليكي يا لبنى ..تعالي .. "تعالي" بكل حروفها ووقع صوتها في قلبك
  • أنتِ على مشارف الشفاء .. ادلقي كل حاجة مرة واحدة ومتخافيش تخفّي.
  • معلش .. الصورة لازم تفضل موجودة شوية .. رسالة لبنى هنا

هناك 9 تعليقات:

Lobna Ahmed يقول...

اللعنة! عايزة أرد على الرسالة دي بس خايفة

Bent Ali يقول...

بس انا مش بخذل حد يا حنان رغم كل الخذلان
الخذلان مش عايزة اتكلم عليه كتير عشان المعنى ما يبقاش مبتذل من كتر استخدامه ومن كتر ما كل الناس حاسة انها اتخذلت

لكن انا المعنى ده شربته على مهل وبجرعات مكثفة لحد التقيىء

التقيىء اللى سمح لنفسه يتشكل فى كلمات تعمل تدوينات ممكن تعجب الناس من كتر احساسهم بالمعنى

لكن مؤخرا منعت نفسي من التقيىء ده عشان انا بحترم مشاعري قوى وبخاف عليها من الابتذال

بس عارفة تعبت

تاكاشى يقول...

وأظل معلق انا بين حنان ولبنى
لا ألوى على شىء سوي بعض الوجع

مصطفى سيف الدين يقول...

يا الله
من أين أتيتما بتلك القوة التي تستطيعان من خلالها كتابة و قراءة تلك الرسائل
أغبطكم لذلك
ذراعان فقط يحملان الحنان غير مدفوع الأجر بلا مقابل إيجادهما ليس بالشيء اليسير في ذلك العالم
أتمنى أن تجدينهما يا لبنى قريبا عند حنان و أتمنى لحنان أن تجدهما لديكِ
ليس هناك أبهى من أن يفرغ الأصدقاء أحمالهم الثقيلة ثم يضحكون
أسأل الله أن يظلل عليكما بسحابة السعادة فتمطر عليكما بالخير
تحياتي

Mohamed Abd elnaser salama يقول...

بجد ايه الجمال ده (Y)

كـريـــمومـــــتر يقول...

وأنا ماما ومش بخاف وعندي دراعات ليكي يا لبنى ..تعالي .. "تعالي" بكل حروفها ووقع صوتها في قلبك ...
آسف ..

كـريـــمومـــــتر يقول...

وأنا ماما ومش بخاف وعندي دراعات ليكي يا لبنى ..تعالي .. "تعالي" بكل حروفها ووقع صوتها في قلبك ..
آسف ...

الازهرى يقول...

كنت اكتبها منذ قلليل

ليس اعظم نعمة من محبة الاصدقاء

أدامها الله عليكم

كـريـــمومـــــتر يقول...

وأنا ماما ومش بخاف وعندي دراعات ليكي يا لبنى ..تعالي .. "تعالي" بكل حروفها ووقع صوتها في قلبك ...
آسف ...