الخميس، 1 مارس 2012

إلي حنان


انهرده عيد ميلادي..آه..أنا اتولدت من سنين كتير كده..يجي 24 سنة..ونزلت في الخمسة وعشرين..

احكيلكم علي اسطورة عيد ميلادي؟؟

انا اتولدت يوم 29 فبراير..اتولدت ولادة طبيعية في الماتيرنيتيه..مستشفي ولادة في اسكندرية

ماما بتقول انها محستش بألم وهي بتولدني..وبابا كان بيحبني قوي لانه بيحب البنات

هو قالها نسجلها ف نفس اليوم اللي اتولدت فيه وهي ابدا

عادل يا شافعي..جوزها هيتحجج ومش هيجبلها هدايا غير كل اربع سنين مرة..يا ماما افهمي..دي حاجة مميزة ربنا اداها للبنت نحرمها منها ليه..لا ياخويا..لا وايه كمان كل اربع سنين وكمان اخر الشهر..سجلها 1 مارس..وقد كان

انا بقى لما كبرت قررت احتفل بعيد ميلادي في نفس اليوم اللي اتولدت فيه..عالفيس 29 فبراير..في كل حتة كده ماعدا شهادة الميلاد..عشان جوزي حبيبي لما يجي يعني يبقي يجيبلي هدية كل سنة...

انا من امبارح مبسوطة وسعيدة قوي.. طايرة بكل الناس اللي هنتني سواء اللي سابتلي وول بوست عالفيس او كلمتني في التليفون او حتي اللي كنت بشوفهم لاول مرة في خروجةامبارح وهنوني...قررت اكون مبسوطة حتي لو كان في ناسس بحبهم وعايشين علي وش الدنيا بس قرروا يكونو مش معايا انهرده ولهم رسالة من هنا..رغم اني معرفش هيقرو ولا مش هيقرو....بس انا مش مسامحة..اوحش من انك تغلط انك تظلم كمان اللي غلط فيه بغيابك..ده انهرده عيد ميلادي..كان ممكن تكونو معايا...كان ممكن قوي...انا هفرح انهرده ومش مهم اي حاجة حتي غيابكم..مش عشان هو مش مهم..بس عشان انا استاهل افرح..ولو حتى مؤقتا

عايزة اقول لكل السنين اللي فاتت من عمري..انا متشكرة..استحملتيني واستحملتي نكدي كتير قوي..انتي حلوة قوي ياحنان..وكنتي حلووة قوي مع كل الناس

متزعليش من اللي ظلموكي حتي لو كانو اقرب الناس..عشان هم اكيد مش قصدهم..وزي كل مرة..هيرجعو ياخدوكي في حضنهم ويصالحوكي..وترجعو احسن من الاول..او حتي كل واحد يروح لحاله..بس انتي عارفة..يابخت من بات مظلوم ولا باتش ظالم

خليكي فاكرة انك قلب .. الكلام لحنان طبعا.. وهتفضلي كده لحد ما تموتي..اللي فهموكي ارتاحو..واللي مفهموكيش ظلموكي وراحو..بقول شعر انا،

عارفة ان وحشك المزيكا والغنا..والطير الحر ..بس انتي معادش في ايديكي حاجة تعمليها بقي .. عارفة ان البحر قرر يموت..وعارفة ان في عيلتكم اللي جوزها يموت بتفضل تحد عليه طول الوقت .. فبقيتي أرملة البحر بعد ما كنتي رياح الحنين اللي بتسافرله طول الوقت..هتفتكريه بالخير وتحطي ايدك علي قلبك وتتنهدي وتقوليله انه واحشك.. وعينك تدمع دمعة صغيرة تمسحيها فتروحي لقبره "قلبك" وتقريله كل كلام الحب اللي كان نفسك تقوليه

عارفة ان صاحبتك وحشتك ومكانش ليكي اي حد غيرها..طل الوقت عندها دنيا تانية خاصة ودنيا بتشاركها معاكي وانتي مكانش عندك غير الدنيا اللي هي عايشة فيها هي بس وانتي معاها

عارفة انه معادش ينفع الكلام او انك تقولي انها نسيتك وبعدين باعتك وبعدين رجعت عشان تقولك طب خوووووووووووودي وتمشي تاني

عارفة انك عايزة تقولي بعلو صوتك اللي بيبرر كتير لازم يعرف انه هو الغلطان.. اللي مبيشوفش غير نفسه ووجعه وبس يبقي هو الغلطان

وعارفة انك كنتي مسسامحة ومستعدة تنسي كمان مع ان عمرك ما نسيتي..بس خلاص .. انتي اخدتي اللي يخليكي تبلعي حزنك جوه معدتك اللي بتوجعك طول الوقت دي وتتعايشي لحد ما يجي معادك

عارفة انك مسامحة الكل..وعارفة ومتأكدة انك عمرك ما قصدتي تجرحي حد..بالعكس..في عز فرحتك بتقصدي تفرحي الناس معاكي وتسمعي منهم وجعهم ويعيطو في حضنك مع ان فرحتك قليلة..بترتاحي كده يا ام قلب واجعلي قلبي .. اه انتي مش ملاك وبتغلطي بس عمرك ما قصدتي ولا عمر غلطاتك كانت وجع او جرح

عارفة انك بتحبي بطتك الحلوة الصغنتتة المكببة دي ونفسك تشوفيها احلي واحدة في الكون..هي محدش قالها انك انتي اللي ربتيها من وهي صغيرة..بس ده اللي حصل.. يعني هي فعليا بنتك انتي

فاكرة الخاتم اللي جالك هدية من كام سنة ده .. لسه كل ما بلبسه ببتسم وبفرح وبحس بحب

فاكرة التي شيرت الازرق اللي كان نفسك فيه .. مع انك تخنتي عن ايام ما جالك لسه بتلبسيه وتقولي عمر ما كان هيجي احلي منه

فاكرة الميدالية النصين في حب مصر .. ولسه شايلاها بين القلبب وبعضه

فاكرة الوردة الموف ونصها الازرق ولسه بتبوسيها وتحطيها في الصندوق وتقوليلها خلي بالك عليها

فاكرة القلب الناقص حتة كبيرة وباقيه مع مين J

فاكرة البحر..اللي فجأة بقاله صوت..وبعدين ..سكت

فاكرة شيماء صاحبتك اللي اتجوزت ونفسها قوي ربنا يكرمها وتخلف..وانتي بتدعيلها

فاكرة الثنائي اللي تعرفي نصه وبتحلمي بالنص التاني ونفسك قوي يبقو واحد

فاكرة الدعاوي الكتير قوي لكل الناس اللي قلبك حس بيهم وبوجعهم وكل يوم تفكري ربنا بيهم وتقوليله يخلي باله منهم

فاكرة العصفور..من ايام "فاكرة هتفتحي عينك تلاقيكي في حتة تانية" لحد امبارح..العصفور الحلو اللي بيسافر ويروح ويجي وبيعدي عليكي طول الوقت يلاقيكي شايلاله حبة قمح ويجيبلك معاه ذكرى حلوة ديما

عارفة انك بتحبي مامتك قوي ونفسك تعيش طول العمر يا اما تموتي قبلها..بتعدو تتخانقو وتشدو في شعور بعض بس بترجعو تهزرو قوي وتعاكسيها وتقوليلها يا ام العنين الخضر..هو انا مطلعتش مزة زيك كده ليه

عارفة انك محافظة علي نفسك متخدرة من وقت كويس.. وخايفة لتفوقي..

بتحبي الكتابة ونفسك ف نوبل..ومش بس كده.. كل العالم يكتب وكل العالم يقول وكل العالم يكرر منك... وبتقولي لو كان نصيبك تخسري كل حاجة فداها ففانتي موافقة قوي..علي فكرة هي بتحبك هي كمان واناحاسة انها بتطبطب عليكي كتير الايام دي


عارفة ان نفسك حد يحكيلك حدوتة ويفضل جمبك لحد ما تنامي


عارفة كمان ان نفسك حد يعملك ضفيرة زي زمان خصوصا ان شعرك طول وبقى حلو شوية كده


اخر حاجة نفسي اقولهالك.. متنسيهاش..

"لو كان نصيبك كل ما تلمس قلب يموتك..قول يارب...ياااااااااااااااااارب.. قلبي اللي بين ايديك بتقلبه كيف ما تشاء...يارب..نفسه في ضحكة صغيرة..وبعدين يموت"

دي اغنية محمد محسن..مش عارفة مين العبقري اللي كاتبها

بس عارفة ان عمرك ما لمستي قلب الا وموتك..واللي لسه مموتكيش..فعشان لسه معاده مجاش..متشائمة صح؟؟ بس حقيقة قوي النقطة دي...فانتي قولي يارب.. ربنا بس ف يايديه كل شئ

اخر حاجة نفسي اقولها من قلبي..يارب..انا بحبك قوي..عارفة اني دورت بين قلوب الناس علي قلب عشان قلبي ميفضلش لوحده..بس انا كنت بدور وانت ديما هنا..عمرك ما ردتني..عمرك ما كسرتني..عمرك ما بعتني..انا اللي ببعد وكل ما ارجع الاقيك موجود..ومستنيني..يارب...انا بحبك قوي علي فكرة.

هناك 6 تعليقات:

شمس النهار يقول...

كل سنة وانتي طيبة وبخير وصحة وسعادة

ومحققه كل احلامك

nigro يقول...

"لو كان نصيبك كل ما تلمس قلب يموتك
قول يا رب .. قلبي اللي بين ايديك بتقلّبه كيف ما تشاء
يا رب نفسه في ضحكة صغيرة
و بعدين يموت" - أحمد العايدي

كل سنة و انت طيبة يا حنة :)

مصطفى سيف الدين يقول...

هو مهم اوي ان الزوج يجيب هدية عيد ميلاد لزوجته كل سنة للدرجادي؟
كل سنة و انتي طيبة
قصدي كل اربع سنين و انتي طيبة :) و بخير
و عقبال 100 اربع سنين تانيين
يعني تحتفلي بعيد ميلادك المية و انتي عندك اربعمية سنة

مدونة عرفة فاروق يقول...

كل سنة وانتى طيبة

كلام كتير موجوع ....

على باب الفرح ملطوع

مستنى نسمة هوا

علشان يشد القلوع

للبحر لما ينادى

ــــــــــــــــــــ

لم أعرف ان للبحر ارملة!
أحببت رياح الحنين كانت تحمل بعضا من ندى البحر
أما بخصوص الضفيرة والشعر الطويل الحلو ......
جعلنى ذلك ابتسم ...

Unknown يقول...

أسلوب رائع و حرف صادق يحاكي مخاجات الذات و الخاطر في أناقة و جمالية

تحياتي

سعيا منها لتطوير النقاش و الاستفادة من المدونين العرب ، مدونة الزمن الجميل تدعوك للزيارة و التفاعل !!!

Angham Salah يقول...

كل سنه وانتي طيبه عقبااااااااااااال مليار سنه ف سعاده وحب
ققري انك تحبي نفسك وتعيشي سعيده